Muǵalimniń sıfrly profıli jobasy jeltoqsanda iske qosylady
Oqý-aǵartý mınıstri Asqat Aımaǵambetov 2022 jylǵy jeltoqsanda muǵalimniń sıfrly profıli pılottyq rejımde iske qosylatynyn aıtty, dep habarlaıdy Almaty-akshamy.kz inbusiness.kz. silteme jasap.
"Profıl pedagogterge túrli qyzmetterdi alýǵa kómektesetin biryńǵaı júıe bolady. Bos oryndar konkýrsyna qatysý, attestasıa úshin qujattardy tapsyrý, "Jyl muǵalimi" retinde konkýrstar, kýrstarǵa qatysýǵa suranys jasaý qajet bolady, al keıin ótinish avtomatty túrde qalyptasady. Barlyq qoljetimdi jáne qajetti derekter Ulttyq bilim berý derekter qorynan alynady", – dedi mınıstr.
Asqat Aımaǵambetov sondaı-aq bilim berý salasyndaǵy sıfrly sheshimderdi qoldaný týraly baıandady. Respýblıkalyq "Úzdik pedagog" baıqaýyn ótkizý sharttary sıfrovızasıa jetistikterimen jańartylmaq.
"Biz qatysýshylardyń keıbir derekterin avtomatty túrde alý úshin Ulttyq bilim berekter qory aqparattyq júıesimen keńirek ıntegrasıalaýdy josparlap otyrmyz. Sondaı-aq, belgili bir talaptarǵa sáıkes, qajetti qujattar qosa tirkeletin formatty-logıkalyq baqylaýdyń keń jıyntyǵyn qosamyz. Sebebi, muǵalimder 50-den astam túrli sertıfıkatty júktegen jaǵdaılar da boldy", – dedi Asqat Aımaǵambetov.
Mınıstrdiń aıtýynsha, Qazaqstanda jas muǵalimder kóbeıgen. Mektep muǵalimderi arasynda pánder boıynsha bastaýysh synyp (849 adam), qazaq tili men ádebıeti (800 adam), aǵylshyn tili (507 adam) jáne matematıka (433 adam) boıynsha jas muǵalimder úlesi basym.