Memleket basshysy Qasym-Jomart Toqaev óz sózinde áıel-analardyń ıyǵyna otbasynyń ǵana emes, búkil ulttyń jaýapkershiligi júktelip otyrǵanyn aıtyp, «El basyna kún týǵanda, asyl analarymyz ben aıaýly arýlarymyz qıyndyqqa moıymaı, ult taǵdyryna aralasty. Eseli eńbegimen jáne eren erligimen tanylǵan áıelderdiń esimderi tarıh jylnamasyna máńgilikke jazylyp, jadymyzda jattalady. Búgingi egemen elimizde de áıelder qaýymy úshin jańa múmkindikterge jol ashyldy. Otbasy ınstıtýtyn, kóp balaly analardy, kásipker áıelderdi qoldaý jáne genderlik teńdikti qamtamasyz etý – memlekettik saıasattyń asa mańyzdy basymdyǵy», – degen edi.
Sondaı úlken jolda ózine degen senim údesinen shyǵyp kele jatqan Sábıla Myrzashqyzy ózi tańdaǵan mamandyqqa arnap qana qoımaı, jıǵany men tergenin, kórgeni men túıgenin jas urpaqqa jalyqpaı úıretip kele jatqan ulaǵatty ustaz. Sonymen qatar, Sábıla Myrzashqyzy qalamyzdaǵy Pýshkın atyndaǵy №4 gımnazıanyń bilikti basshysy. Ustazdar otbasynan tálim-tárbıe alǵan alǵyr qyz sonaý 1982 jyldan beri osy jolda abyroımen eńbek etip keledi. Naǵyz eńbek adamy. Jas kezinde ózge qurby-qurdastarynyń biri ekonomıs, endi biri zańger mamandyǵyn tańdap jatqanda, Sabıla esh oılanbastan ata-anasynyń jolyn qýyp, ustazdyq joldy tańdady. Qazir qarap otyrsa, qatelespegen eken. Eger basqa salany tańdaǵanda ózi qalaǵan arman bıiginen kóriner me edi, kórinbes pe edi? Kim bilsin? Talaı balanyń qolyna qalam berip, qara tanytqan ákesi Myrzash sol aýyldaǵy árbir úıdiń qamqory bolsa, anasy qoǵamdyq jumystyń bel ortasynda júretin naǵyz belsendi edi.
Búginde 93 jasqa kelgen anasy Astanada turyp jatyr. Osyndaı ortadan tárbıe alyp, izgilik nurynan nár alǵan Sábılanyń ómir dastany da ata-anasy salǵan jolmen túıisti. Qalanyń qyzy bola tura, oqý ordasyn bitirgen soń, joldamamen aýylǵa bardy. Alǵashqy eńbek jolyn aýyl mektebinen bastady. Mine, sodan beri shırek ǵasyr boıy osynaý ustazdyq atty uly jolda ımandylyq pen izgilik, adaldyq pen ádildik syndy asyl qasıetterdi boıtumar etip keledi. Arada qansha jyl ótse de, ózinen de, ózgeden de talap etetin minezi áli bar. Ulaǵatty ustaz osynaý jyldar ishinde eńbek jolyn mektep muǵalimi bolyp bastap, balabaqshada tárbıeshi, ádisker, mektep dırektorynyń orynbasary sıaqty barlyq pedagogıkalyq baspaldaqtardan ótti. Uzaq jylǵy tynymsyz eńbeginiń arqasynda mektep basshysy atandy. Qarap otyrsańyz, Sabıla Myrzashqyzynyń eńbek jolynyń ereksheligi de osynda bolsa kerek.
Búginde óz salasynyń bilgiri atanǵan Sábıla Myrzashqyzynyń óz joly bar. Myńdaǵan shákirt tárbıelep, óziniń sheberlik mektebin qalyptastyrdy. Medeý aýdanyndaǵy jas pedagogtardyń aqylshysyna aınaldy. Jalpy, áıel adamnyń qyzmette, ásirese basshy qyzmette júrýi árıne qıyndaý. Mundaı kezde kóbine otbasynyń máselesin emes, ózi basshylyq etip otyrǵan mekeme týraly ǵana oılap, kóp oı túıýge týra keledi eken.
– Ustaz bolýdyń ózi - úlken qurmet. Ustaz eńbeginiń qyzyǵy men qıyndyǵy qatar júredi. Qıyndyǵy ustazdyń aldynda úlken jaýapkershilik, qyrýar mindet tur. Bolashaq urpaqtyń eldiń kósegesin kógertetin, asqaq rýhty bolýy da ustazǵa baılanysty. Sondyqtan elimizdiń ósip-órkendeýine ustazdyń qosyp otyrǵan úlesi mol der edim. Al endi qyzyǵy, ustazdardyń máńgi jas keıpin saqtap, jan jylýyn joǵaltpaıtyn asyl qasıeti. Men óz ómirimde qazaq biliminiń órkendeýine ólsheýsiz úles qosyp, elimizdiń Tuńǵysh Eńbek Eri atanǵan Aıagúl Mırazovany erekshe pir tutamyn. Sol kisige uqsaǵym keledi. Ustazdardyń ustazynan úırengim keledi. Qazirgi aqparattyq zamannyń jeli ustazdarǵa da ózindik áserin tıgizip jatyr. Sondyqtan bolar, bizge qoıylyp otyrǵan talap ta joǵary. Qazirgi zamanǵy ustaz aqparattandyrylǵan, jańa formatty, jan-jaqty, dúnıetanymy keń, tárbıeli ári sanaly shákirt daıyndaýda oqytýdyń tıimdi ádis-tásilderin, zamanaýı ınovasıalyq tehnologıalardy tereń meńgerýi kerek. Sondyqtan da men óz ujymymyzdaǵy ustazdarymyzdyń osy talapqa saı bolýyn birinshi orynǵa qoıamyn. Qazirgi ýaqyttyń bizge qoıar talaby – muǵalim de, mektep basshysy da sapaly bilimge jetý jolynda aıanbaı eńbek etýi kerek. Sondyqtan mektebimizde qoǵamdyq ózgeristerge tez ıkemdeletin, jańalyqqa jany qumar, shyǵarmashyl, ıaǵnı deńgeılik kýrs baǵdarlamasyn oqyp-úırenip, tájirıbede qoldaný arqyly nátıjege jetip júrgen ustazdarymyz óte kóp, – deıdi Sabıla Myrzashqyzy.
Búgingi bilim júıesi jańasha damyǵan, ózgeristerge toly. Jas urpaq jańa býyndy oqýlyqtarmen, jańa tehnologıalarmen bilim alýda. Órkenıettiń tól týyndylary tórge ozdy. Osynaý ushqyr ýaqyt zamanaýı basshydan ne talap etedi? Qazirgi mektep basshysy qandaı bolýy kerek? Eń aldymen, senimdi jetekshi bolý, jaýapkershilikti ózine alý, uıymdastyrýshylyq qabiletin dáleldeý, óz jumysyn únemi ishteı baǵalaý jáne aldaǵy qajettelikterdi anyqtaý, jańa ıdeıalar men úrdisterdi zerdelep, qajettisin tańdaýda bastamashyl bolý, berilgen tapsyrmalardyń ýaqytynda durys oryndalýyn qadaǵalaý, mektep ómirinde kezdesken sıtýasıalyq jaǵdaılardy sheshe bilý. Mine, osyndaı erekshelikter tabıǵat bergen sabyrly minez ben uzaq jylǵy tájirıbege baı Sabıla Myrzashqyzynyń boıynan tabylary anyq.
Ulaǵatty ustaz mektepte bilikti basshy bolsa, otbasynda asyl jar, ardaqty ana, súıikti áje. Jarasymdy otbasynyń otaǵasy Talǵat ǵylym salasynda, profesor, balalary Nádir, Ásel, Ǵalymjan, Aqmaral, Arýjan, qylyǵy baldaı tátti nemereleri Sábıla Myrzashqyzyn árkez saǵyna tosyp otyrady. Ortasyna da, otbasyna da qadirli Sábıla Myrzashqyzy syndy áıeldermen álem de ádemi eken.
Ázirlegen Raıa ESKERMESQYZY.