Erenǵaıyp Qýataıuly endi Praga jarty marafonyna qatysady.
Byltyr AQSH-tyń Nú-Iork qalasynda alǵash bolyp otandastarymyzdyń arasynda alty meıjor marafondy 3 saǵat ishinde júgirgen Erenǵaıyp Qýataıuly Portýgalıanyń Lıssabon qalasynda ótip jatqan Lisbon half marathon-2024 marafonyna qatysyp jatyr, dep habarlaıdy Almaty-akshamy.kz
Ol marafonda júgirip, márege 1 saǵat 21 mınýt 53 sekýndtta jetti. Óziniń aıtýynsha, nátıje jaman emes.
«Keshe men alty jartyny bastadym. Nátıje jaman emes: 1:21:53. Lisbon half marathon tolyq marafonnan kem bolǵan joq. Álemniń ár jerinen 37 500 adam qatysqan surapyl jarys boldy. Aıtpaqshy, jarty marafonnyń álemdik rekordy osy Lıssabon jarty marafonynyń enshisinde. Eki jyl buryn ýgandalyq jelaıaq Kıplımo Djeıkob 57:31 nátıjesimen talaıdyń tańdaıyn qaqtyrǵan bolatyn. Bıyl Lıssabonda kún ystyq boldy. Soǵan baılanysty bolǵan shyǵar, álem rekordy jańarmaq túgili, oǵan baqandaı 3 mınýt jetpeı qaldy.Qalaı bolǵanda da uıymdastyrý deńgeıi meıjor marafonnan esh kem bolǵan joq. Tek pýblıkanyń aǵylshyndar sıaqty agressıvti qoldaýy jetispeı qalǵan sıaqty. Sonymen, Superhalfs-tyń alǵashqy medaly qaltada. Alda sáýirde Praga kútip tur. Marafon tek dalaqtap júgirý emes, onyń da fılosofıalyq máni bar. Marafon – jiger. Marafon – tártip. Marafon – qaıyrymdylyq. Marafon – saıahat», – dep jazdy ol óziniń FB paraqshasynda.