Jeke tulǵalardyń tabysy men múlki týraly deklarasıa tapsyrýy bastaldy, dep habarlaıdy Almaty-akshamy.kz QR Qarjy mınıstrliginiń Memlekettik kirister komıtetine silteme jasap.
«2021 jyly jalpyǵa birdeı deklarasıalaýdyń birinshi kezeńiniń aktıvter men mindettemeler týraly deklarasıany (250.00 nysan) tapsyrý merzimi aıaqtaldy. Birinshi kezeń aıasynda deklarasıany memlekettik qyzmetshiler men olarǵa teńestirilgen tulǵalar, sondaı-aq olardyń jubaılary (zaıyptary) usynǵan. Osy jyldan bastap bul tulǵalar jyl saıyn tabysy men múlki týraly deklarasıany tapsyratyn bolady (270.00 nysan). Onda esepti kúntizbelik jyly alynǵan kiristeri, salyq shegerimderi, múlki, Qazaqstan Respýblıkasynan tysqary jerde ornalasqan sheteldik bankterdegi banktik shottardaǵy aqsha, sondaı-aq Qazaqstan Respýblıkasynan tysqary jerlerdegi múlikti satyp alý jáne (nemese) ıelikten shyǵarý týraly málimetter kórsetiledi», - dep atap ótedi komıtetten.
Vedomstvo málimetinshe, kiristeri men múlki týraly deklarasıany «Salyq tóleýshiniń kabıneti» (kgd.gov.kz), eSalyq Azamat mobıldi qosymshasy arqyly, sondaı-aq qaǵaz túrinde memlekettik kirister organdaryna nemese halyqqa qyzmet kórsetý ortalyqtaryna kelip qolma-qol tapsyrýǵa nemese poshta arqyly jiberýge bolady.
Birinshi kezeńdegi jeke tulǵalar úshin tabysy men múlki týraly deklarasıany qaǵaz túrinde 2022 jyldyń 15 shildesinen keshiktirmeı, elektrondy túrde 2022 jyldyń 15 qyrkúıeginen keshiktirmeı tapsyrý qajet.