“Narkostop” jobasy Almaty qalasy Jastar saıasaty basqarmasynyń qoldaýymen nashaqorlar men olardyń jaqyndary úshin eki aıdan beri tegin jumys istep turǵan jedel jelini iske qosty.
(8-727) 339-51-99, WhatsApp +7-747-461-67-01 nómirleri boıynsha addıktolog mamandar aýrý týraly egjeı-tegjeıli áńgimeleıdi, keńester júrgizedi. Sonymen qatar qajet bolǵan jaǵdaıda bilikti psıhologıalyq kómek kórsetedi, dep habarlaıdy Almaty-akshamy.kz Polisia.kz-ke silteme jasap.
«Esirtkige táýeldilik HHİ ǵasyrdyń obasyna aınaldy. Bul turmysy jaqsy otbasylardyń aýrýy dep atalady, óıtkeni 90-shy jyldardaǵy nashaqorlyqtan aıyrmashylyǵy, qazirgi sıntetıkalyq nashaqorlar negizinen turmysy jaqsy otbasylardan shyqqan jáne bul mundaı nashaqordyń týystary úshin kútpegen jaıt bolady. Emdeýdiń sátti bolýy kómektiń qanshalyqty durys kórsetilýine baılanysty. Biraq bul táýeldilik salystyrmaly túrde jas jáne ol týraly ashyq aqparat kózderinde málimet az bolǵandyqtan, nashaqorlardyń týystary ýaqyttaryn joǵaltyp alýy múmkin», – deıdi “Narkostop” jobasynyń úılestirýshisi Nurjan Jaqypov.
Spıkerdiń aıtýynsha, jedel jeli telefonyna kúnine 30-ǵa jýyq qońyraý kelip túsedi.
«Anonımdilik shartymen kómek kórsetiledi. Biz nátıjege qanaǵattanamyz jáne qyzmetimizdi tıimdi dep sanaımyz. Keıbir abonentter operatorlarmen sóıleskennen keıin emdelý týraly sheshim qabyldaıdy jáne bizdiń tegin kómek kórsetý toptaryna qatysa bastady. Týystary qıyn jaǵdaıǵa tap bolyp, táýeldi bolyp qalǵan qala turǵyndaryn beıjaı qaramaýǵa, ýaqytty bosqa ótkizbeýge shaqyramyn. Kómektesý múmkindigin ózińiz izdeńiz nemese bizdiń telefondarymyzǵa habarlasyńyz. Onda sizge bilikti kómek kórsetiledi», – dedi Nurjan Jaqypov.
Sonymen qatar, Polısıa departamenti 8-705-549-70-25 jedel jeli telefonyn eske saldy, onda azamattar esirtki qylmystary týraly aqparatty jasyryn túrde habarlaı alady. Onyń ishinde esirtki saıttarynyń trafarettik jarnamasy salynǵan oryndar jaıynda habarlaýǵa bolady.