Maýsymnyń 25-inen bastap 40 kúndik «Shilde» amaly tabıǵat sahnasynyń tórine shyǵady.
Qazaqtyń jyl sanaýy boıynsha (naýryzdan bastap), jazdyń alǵashqy aıy da bitýge jaqyn. Endigi kezek – shilde aıyniki. Erterekte qazekeń shilde aıyn – áset (asad) dep ataǵan (arab sózi). Qazaqsha arystan degendi bildiredi (Zodıak belgisi boıynsha, jyldyń besinshi aıynyń ataýy). Shilde aıynda amal kóp: Tarazy (naryq) juldyzy týady, tań sýyıdy, «Sýyr» amaly keledi. «Úrkerdiń tolǵaǵy» bastalady. Qyryq kún shilde halyq aýzynda «Sýyr» dep te atalady. Sumyraı degen sóz sýyr aıy degen maǵynada. Sodan halqymyz: «Sumyraı kelse, sý qurıdy», – deıdi. Ol amaldar jóninde óz kezeginde jazatyn bolamyz.
Jazdyń ekinshi aıynda da jaýyn-shashyn az bolmaıtyn túri bar. Ylǵal mol bolatyn sıaqty. Aspan álemi túıdek-túıdek bulyńǵyr bulttan arylmaı-aq qoıdy...
Biraq biz búgin shilde aıyn emes, Shilde amalyn sóz etpekpiz. Búgindi sanamaǵanda, endi 1 kúnnen keıin Shilde amaly bastalady. Taǵy bir qısyn – «shilde» arabsha «shıl», qazaqsha «qyryq»- degendi bildiredi eken. 40 kúndik aptapty burynǵylar «Uly shilde» dep ataǵan. Shildeniń ańyzaq, aptap kúnin "kún shilińgir" degen.
Qalaı bolǵanda da, 40 kún shilde kórinis bere bastady. Aýa raıynyń qubylmaly bolǵanyna qaramastan, kúnniń jylýy kemimesi anyq. Shildeniń aty – shilde ǵoı. Biraq bul jańbyr jaýmaıdy degen sóz emes. Aldaǵy aptada aptap ystyqpen birge nóserli jaýyn, ókpek jel, salqyn samal bolýy ábden múmkin. Naızaǵaı oınap, kún kúrkireýi de ǵajap emes.
Maýsymnyń 24-inde Úrker tań ata batystan kórinedi de, sodan shilde-tamyz aılarynda 40 kúnge sozylatyn ystyq bastalady. Osy aptapty shaq halyq arasynda «qyryq kún shilde» dep atalǵan.
Búgin qoldanystaǵy kúntizbe boıynsha, maýsymnyń 23-i, aı esebine súıensek, maýsymnyń – 24- i. Al bizdiń babalardyń esebinshe, osy aıdyń – 10-y. Apta aıdyń basyn jáne sońyn túgel qamtyp tur. Bul osy merzimde aýa raıynda az da bolsa ózgeris bolatynyn bildiredi. Apta aıdyń basyna, ortasyna jáne sońyna dóp kelip tur. Aspan deneleriniń bildirýinshe, osy aptada jańbyr sıreksip, kún erekshe ysıtyn syńaıly. Naǵyz jaz aıy endi seziletin bolady...