Óndiristegi tehnıkalyq qural jabdyqtardy jańǵyrtý mindettelmek.
«Qazaqmystaǵy» apattan keıin óndirispen aınalysatyn kompanıalarǵa qoıylatyn talap qatańdaıdy, dep habarlaıdy aqshamnews.kz
«Qazaqmystaǵy» apattan keıin Úkimet qaýipti óndirispen aınalysatyn kompanıalarǵa tehnıkalyq jabdyqtaryn jańǵyrtýdy mindetteıdi.
«Úkimet Prezıdenttiń tapsyrmasymen ónerkásip qaýipsizdigin qamtamasyz etý boıynsha talaptardy kúsheıtedi», – delingen baspasóz habarlamasynda.
Qandaı sharalar qolǵa alynady?
Úkimet ónerkásipte qaýipsizdikti qamtamasyz etý úshin mynadaı sharalar qoldanady:
Qaýipsiz eńbek tujyrymdamasy aıasynda nysandar sıfrlandyrylady;
normatıvtik-quqyqtyq aktiler qaıta qaralady;
ónerkásip qaýipsizdigi men ǵylymdy damytýmen aınalysatyn nysandarǵa qoıylatyn talap kúsheıedi;
memlekettik eńbek ınspektorynyń kadrlyq áleýeti men quqyqtyq mártebesin arttyrý jónindegi talaptar qatańdaıdy.
Talaptar kúsheıtiledi
Sonymen birge óndiristik nysan ıelerine tehnıkalyq qural jabdyqtaryn jańǵyrtý mindettelmek.
«Qazirgi ýaqytta ónerkásip qaýipsizdigi boıynsha jekelegen talaptar qaıta qaralyp jatyr. Osylaısha, azamattyq qorǵaý týraly zań jobasy sheńberinde apattyq-qutqarý qyzmetterine qoıylatyn talaptar qatańdatylady, óndiristik baqylaý standarttary kúsheıtilýde, qaýipti óndiristik nysandar ıelerine jabdyqtardy jańartý jáne jańǵyrtý boıynsha jańa mindetter kózdelgen», – delingen baspasóz habarlamasynda.
Ónerkásiptik qaýipsizdik nysandaryn pasporttaýǵa baǵyttalǵan jáne apattardy esepke alý prosesterin avtomattandyratyn «E-ÓQK» aqparattyq júıesi iske qosylady.