Quqyqtyq tártip áskeri saqshylarymen ekstremızmniń aldyn alý boıynsha kezdesý ótti
Keıingi jyldary halyqaralyq terorızm aýqymy, keltirilgen zalaldary men jıiligi adamzattyń eń ózekti máselesine aınalyp otyr. Onyń ishinde dinı ekstremızmniń orny bólek. Dinı ekstremızm kóp jaǵdaıda saıasatpen birigip, qoǵamdy turaqsyzdandyrýǵa baǵyttalǵan jáne ulttyq qaýipsizdikke qater tóndiretin qural.
Osy oraıda Syr elindegi Ulttyq ulannyń 5547 áskerı bóliminde jeke quramnyń ózge dinı aǵymdarǵa erip ketpeýi, terorızm men ekstremızmniń qurbany bolýdyń aldyn alý maqsatynda kezdesý ótti. Jıynǵa Qyzylorda oblysynyń Din isteri basqarmasynyń «Din máselelerin zertteý ortalyǵy» KMM-niń aǵa mamany-teolog Baqtıar Ospan, Qyzylorda oblystyq polısıa departamenti ekstremızmge qarsy is-qımyl basqarmasynyń aǵa jedel ýákili polısıa maıory Amangeldi Qulahmetov jáne 5547 áskerı bóliminiń áskerı polısıa bólimshesiniń bastyǵy podpolkovnık Qaıtar Imanqulov qatysty.
Teolog Baqtıar Esengeldiuly zaıyrly memleket, dinı ekstremızm men terorızm uǵymdary, destrýktıvti dinı aǵymdardyń jáne ǵalamtor jelisi arqyly dinı bilim alýdyń qaýiptiligi, sondaı-aq Qazaqstan Respýblıkasynyń aýmaǵynda sot sheshimi boıynsha tyıym salynǵan ekstremıstik, terorıstik uıymdar týraly keńinen aqparat berdi. Sonymen qatar jat aǵymdardyń jeteginde júrgen azamattardyń qoǵamǵa qaýip týdyratyn tustaryna toqtalyp ótti.
Polısıa maıor Amangeldi Izatýllauly men podpolkovnık Qaıtar Imanqulov jeke qurammen áńgimelesý barysynda dinı ekstremızm men terorızmge qarsy is-qımyl nysandaryn, áleýmettik jelilerde dinı ekstremızmniń aldyn alý ádisterin tilge tıek etip, quqyqtyq saýattylyqqa erekshe nazar aýdardy. Sondaı-aq jeke quramǵa ekstremıstik baǵyttaǵy quqyq buzýshylyq jasaǵany úshin jaýapkershilik bary túsindirildi.
Kezdesý sońynda jat aǵymnyń jetegine erip, onyń qurbanyna aınalǵan jandar týraly beınerolıkter kórsetildi.