Memleket basshysy Qasym-Jomart Toqaev «Egemen Qazaqstan» gazetine bergen suhbatynda áleýmettik jáne saıası máselelerge toqtalyp, eldegi qarapaıym halyqtyń jáı-kúıi men hal-ahýaly jaıly keńinen oı bólisti. Sondaı-aq, bilim, ǵylym, jastardyń jumysqa qabilettiligin arttyrý da Prezıdentimizdiń nazarynan tys qalǵan joq.
2023 jyly atqarylǵan jumystardyń arasynan elimizdiń túkpir-túkpirinen ashyla bastaǵan bilim oshaqtary, onyń ishinde «jaıly mektepter» týraly da aıryqsha atap ótti. Medısına qyzmetkerleriniń, mektepte, kolejde jáne balabaqshada jumys isteıtin pedagogterdiń jalaqysynyń ósýi, Ulttyq qordan balalarǵa qarjy berý máseleleri de 2024 jyly ary qaraı óz jalǵasyn tabatynyn aıtty.
Bıylǵy jyly ǵylym salasynda áıgili ǵalym Qanysh Sátbaevtyń 125 jyldyǵy toılanbaq. Ǵylym salasyna ólsheýsiz úles qosqan ǵalymnyń mereıtoıynyń aıasynda ǵylymǵa bar ómirin arnap, aıanbaı eńbek etip júrgen jandar úshin paıdaly is-sharalar ótkiziledi dep senemiz.
Sondaı-aq, Memleket basshysy daryndy jastardy qoldaý máselesine qatysty pikirin bildirdi. Ótken jyly Prezıdenttik jastar kadr rezervi jasaqtalǵan bolatyn. İrikteýden ótken kásibı jas mamandar qazirgi tańda memlekettik basshylyq laýazymdaǵy jumystaryn bastap ketkendigin aıtty. Álemniń kún saıyn ózgerip jatqandyǵyn, jańa tehnologıalar men mamandyqtar, salalar paıda bolǵanyn, osy oraıda ózgeshe oılaıtyn, tyń ıdeıalary bar jas mamandardyń atqaratyn róli zor ekendigin jetkizdi. Qazaq jastaryna senetinin, elimizdiń ekonomıkasy damyǵan, demokratıaly elderdiń qatarynan kórinýi úshin aǵa býynnyń tájirıbesi men jas urpaqtyń ózgeshe synı kózqarasynyń toǵysýy qajettiligin aıqyndady.
Prezıdentimiz osyǵan deıingi aıtqan sózderinde qazirgi tańda naryqta tehnıkalyq mamandyq ıeleriniń jetispeýshiligin tilge tıek etken bolatyn. Jahandyq ekonomıka jáne halyqaralyq eńbek naryǵy túbegeıli ózgerip jatqan tusta elimizdiń myqty ónerkásiptik negizin qalyptastyrý jáne ekonomıkamyzdy ózimiz tolyq qamtamasyz ete alatyn jaǵdaıǵa jetý qazirgi tańdaǵy eń mańyzdy mindetterdiń biri bolyp otyr.
Prezıdent saılaý aldyndaǵy baǵdarlamasynda «Ǵylym jáne tehnologıalyq saıasat týraly» zań qabyldaý týraly bastama kótergen bolatyn. Qazir ázirlenip jatqan zań jobasynda ekonomıkamyzdy ǵylym men ınovasıaǵa súıene otyryp damytý logıkasynyń kórinis tabýy mańyzdy ekenin aıtty.
Bilim – taýsylmaıtyn qazyna. Bilimdi, sapaly, básekege qabiletti jastar – elimizdiń bolashaǵy. Memleket basshysy jańa ekonomıkalyq úlgige kóshý, 2029 jylǵa qaraı jalpy ishki ónimdi qazirgiden eki ese arttyrý máselesiniń erekshe qolǵa alyný qajettiligin atap ótti. Ol úshin sapaly kadrlardy daıyndaý jumystary júrgizilýi qajet. Osy oraıda Azamattyq avıasıa akademıasy kadr jetispeýshiligin azaıtyp, jumys berý mekemeleriniń talaptaryna saı avıasıa salasy qyzmetkerlerine sapaly bilim berý úshin baryn salýda. Ustazdarymyz únemi kásibı biliktiligin arttyryp, stýdentterge sońǵy úlgidegi metodıkalarmen sabaq berýde. Bir jaǵadan bas, bir jeńnen qol shyǵara otyryp, elimizdiń damýyna barynsha úles qosý, bilim men ǵylymdy damytyp, óskeleń urpaqty adalynan eńbektenýge, halyqqa qyzmet etýge shaqyrý, óz azamattyq avıasıa salamyzdy tereńinen meńgerip, naǵyz kásibı maman bolyp qalyptasý, Qazaqstanymyzdyń gúldenýine, álemdik naryqta óz ornyn oıyp turyp alýyna sál de bolsyn úles qosý – árbir qazaqstandyqtyń Otan aldyndaǵy mindeti bolyp qala bermek!