Almatyda alǵash ret City Makers: Jastar qalasy aýqymdy qalalyq qaýymdastyqtar festıvali ótti. Ashyq aspan astyndaǵy biregeı is-sharaǵa 7 000-nan astam kórermen jınaldy. Sonymen qatar, 107 qaýymdastyq pen 50-den astam jumys berýshi qatysyp, qala turǵyndary men qonaqtaryna bastamasy men áleýmettik jobasyn usyndy. Joba Almaty qalasy Jastar saıasaty basqarmasynyń qoldaýymen júzege asty.
City Makers – jastardyń bastamasyn qoldaýǵa, shyǵarmashylyqty jáne salaýatty ómir saltyn nasıhattaýǵa jáne jastar qaýymdastyqtarynyń birigýine baǵyttalǵan jańa formattaǵy alań. Munda qaýymdastyqtar, mádenı bastamalar jáne qaladaǵy túrli ortalyqtar bas qosyp, tájirıbe almasyp, jańa seriktestik baılanys ornatty. Qatysýshylar úshin bul tek kórme emes, sonymen birge jan-jaqty netvorkıng alańyna aınaldy. Festıválge kelgen jastar ózderine unaǵan baǵyt boıynsha qaýymdastyqtarǵa jazylyp, aldaǵy ýaqytta belsendi múshesi bolýǵa nıet bildirdi.
«Biz búgingi is-shara arqyly qalamyzdaǵy eń belsendi qaýymdastyqtardy bir ortaǵa jınap, qala turǵyndaryna tanystyrýdy maqsat ettik. Bul Almaty jastarynyń áleýetin ashyp, olardyń qoǵamǵa qosyp jatqan úlesin keńinen dáripteýge arnalǵan erekshe bastama. Osyndaı jobalar arqyly azamattyq jaýapkershiligi joǵary, shyǵarmashyl ári belsendi býyn qalyptasady», – dedi Almaty qalasy Jastar saıasaty basqarmasynyń basshysy Azız Kajdenbek.
Festıvál baǵdarlamasy da erekshe boldy. Qonaqtar «Qamqorlyq dańǵyly», «Tártip dańǵyly», «Eko Town», «Shyǵarmashylyq shaǵyn aýdany» syndy arnaıy aımaqtardy aralap, teatrlandyrylǵan jáne mýzykalyq qoıylymdardy tamashalady. Sonymen qatar, sheberlik dáristerine qatysyp, pikirtalas alańdarynda ózekti máselelerdi talqylap, sporttyq oıyndarǵa qatysty. Áleýmettik jáne ekologıalyq jobalardyń tusaýkeserleri kórermenderge erekshe áser qaldyrdy.
Festıvál jastardy áleýmettendirýdiń tyń quraly retinde de baǵalandy. Ásirese, aımaqtardan Almatyǵa kelgen stýdentter qala ómirine beıimdelip, qyzyǵýshylyqtaryna sáıkes qaýymdastyq taýyp, jańa ortaǵa tez sińisý múmkindigine ıe boldy. Bul bastama olardyń belsendiligin arttyryp qana qoımaı, úlken megapolıstegi ómirge senimdi qadam basýyna jol ashty.
«Men Almatyǵa endi ǵana keldim. Búgin ózime qyzyq birneshe qaýymdastyq taýyp, jazylyp qoıdym. Osyndaı is-sharany uıymdastyrǵandarǵa erekshe alǵys bildiremin», – dedi festıválge qatysqan birinshi kýrs stýdenti Aıdana Seıitova.
City Makers: Jastar qalasy festıvali almatylyq jastardyń jigeri men shyǵarmashylyq áleýetin, olardyń qala ómirine belsendi qatysyp, qoǵamnyń damýyna úles qosýǵa degen talpynysyn kórsetti. Uıymdastyrýshylardyń aıtýynsha, aldaǵy ýaqytta festıvál aýqymyn keńeıtip, jalǵasyn tabady.