Almaty polısıasy 30 qyrkúıekte ÝEFA aıasynda ótetin almatylyq "Qaırat" pen madrıdtik "Real" arasyndaǵy halyqaralyq fýtbol machy úshin tolyq daıyn ekenin málimdedi, - dep habarlaıdy Aqshamnews.kz tilshisi.
Bul oqıǵa búkil qala úshin naǵyz sport merekesine aınalyp otyr jáne qaýipsizdik pen tártipke erekshe nazar aýdarýdy talap etedi.
Qalalyq Polısıa departamentiniń baspasóz qyzmetiniń habarlaýynsha, quqyqtyq tártip pen qaýipsizdikti qamtamasyz etý úshin keshendi sharalar qabyldanǵan. Qoǵamdyq tártipti qorǵaýǵa 2,5 myńnan astam qyzmetker tartylady. Negizgi mindetteri - jankúıerler men oıynǵa qatysýshylardyń qaýipsizdigin qamtamasyz etý jáne jol qozǵalysyn retteý.
"Qurmetti almatylyqtar, megapolıs qonaqtary! Erteń bizdiń qalamyz úlken oqıǵanyń arenasyna aınalady - halyqaralyq "Qaırat – Real Madrıd" fýtbol machy ótedi. Biz álemniń túkpir-túkpirinen kelgen jankúıerlerdi qarsy alýǵa qýanyshtymyz. Bul biz úshin tek sport merekesi ǵana emes, Almatynyń shynaıy beınesin - qonaqjaılyqty, qurmetti jáne joǵary mádenıetti kórsetetin múmkindik", - dedi Almaty qalasy DP Jergilikti polısıa qyzmeti basqarmasy bastyǵynyń orynbasary Tımýr Noǵaıbaev.
Quqyq qorǵaý organdarynyń ókili mach ótetin kúni qozǵalysqa ishinara shekteýler engiziletinin atap ótti. Bılik ókilderi turǵyndardan joldardy aldyn ala josparlaýdy, ýaqytsha sharalarǵa túsinistikpen qaraýdy jáne kóshe men kólikte, stadıonda tártipti qatań saqtaýdy suraıdy.
"Komandany qyzý qoldaıyq, biraq mádenıetti túrde. Birge tazalyqty saqtap, bir-birimizge jáne qonaqtarymyzǵa qurmet kórseteıik. Jaýapty minez-qulyq - Almaty men búkil eldiń ımıjine qosqan úlesimiz", - dep qosty ol.
Sonymen qatar, almatylyq "Qaırattyń" aldaǵy qarsylasy madrıdtik "Real" fýtbolshylary Almatyǵa keldi. Olardyń kelýi fýtbol jankúıerleri úshin úlken oqıǵa boldy: áýejaıda qarsy alýǵa jınalǵan jankúıerler men jýrnalıser aty ańyzǵa aınalǵan oıynshylardy kórýge asyqty.