Olar oqýshylarǵa aǵylshyn tiliniń deńgeıi men bilimin arttyrýǵa kómektesip jatyr.
Almaty qalalyq Jas Otan jastar qanaty English for Jastar jobasy sheńberinde halyqtyń áleýmettik osal tobynan shyqqan balalarǵa tegin aǵylshyn tilin oqytý kýrstaryn bastady, dep habarlaıdy Almaty-akshamy.kz.
English for Jastar jobasy alǵash ret 2018 jyly Elbasy, Tuńǵysh Prezıdent Nursultan Nazarbaevtyń Jarlyǵy aıasynda iske asyrylatyn úshtildilikti engizý jónindegi aýqymdy baǵdarlamany qoldaý úshin iske qosyldy. Bul joba oqýshylarǵa aǵylshyn tiliniń deńgeıin kóterýge jáne olardyń qarym-qatynas daǵdylaryn jaqsartýǵa baǵyttalǵan.
Nur-Sultan baspasy usynǵan uzaqtyǵy 6 aı fakúltatıvtik kýrstardyń birinshi aǵymynda kóp balaly otbasylardan shyqqan 11 bala oqyp jatyr. Jobanyń basty maqsaty - jas býynǵa qoljetimdi sapaly bilimmen qamtamasyz etýge úles qosý. Oqýshylarǵa aǵylshyn tiliniń deńgeıi men bilimin arttyrýǵa kómektesý.
Oqýdy bastaý úshin oqýshylar birneshe kezeńnen ótti:
- Balalar aǵylshyn tilin meńgerý deńgeıin anyqtaý testinen ótti.
- Aǵylshyn tili deńgeıine jáne jasyna sáıkes balalardy toptarǵa bólý.
- Bos ýaqytyn eskere otyryp, sabaq kestesin qurý.
- Oqýshylarǵa aǵylshyn tilinen tegin oqýlyqtar berildi.
«Biz mektep jasyna deıingi jáne mektep jasyndaǵy balalarǵa arnalǵan oqý ádebıetterin ázirleýmen jáne beıimdeýmen aınalysamyz. Mektepterge 2021-2022 oqý jylyna tegin qol jetkizýge siltemeler usynamyz jáne oqý prosesinde respýblıka mektepterinen elektrondyq platformalardy paıdalaný tıimdiligi boıynsha keri baılanys alýǵa qýanyshtymyz. Bul joba aıasynda az qamtylǵan, kóp balaly otbasylardyń oqýshylary, sondaı-aq tolyq emes otbasylardyń balalary men múgedek balalar úshin offlaın rejıminde aǵylshyn tilin tegin oqytýǵa 11 oryn usyndyq» - dedi Nur-Sultan baspasy bas mamany Aıda Ýrazaeva.
Atap ótsek, oqytý halyqaralyq standarttar boıynsha ótedi. Kýrsty sátti aıaqtaǵan oqýshylarǵa sertıfıkattar beriledi.