Malaızıanyń Kýchıng qalasynda tenısten álem chempıonaty ótip jatyr.
Malaızıanyń Kýchıng qalasynda 14 jasqa deıingiler arasynda tenısten komandalyq álem chempıonaty Azıa – Tynyq muhıt aımaǵy boıynsha irikteý kezeńiniń jartylaı fınalısteri anyqtaldy, dep habarlaıdy Almaty-akshamy.kz QazAqparatqa silteme jasap.
Qazaqstan tenıs federasıasynan málim etkenindeı, Mádına Rahymnyń shákirtteri shırek fınalda irikteý týrnıriniń ekinshi raketkasy – Úndistan komandasyn utty.
Aldymen Eva Korysheva qarsylasyn 6:1, 6:1 esebimen oısyrata jeńdi. Sodan keıin Erkejan Jańataeva da qalyspady – 6:4, 6:7, 6:2.
Qazaqstan jasóspirimder quramasy 24 naýryz kúni jartylaı fınalda Japonıamen oınaıdy. Japonıalyqtar shırek fınalda Taıland komandasynan basym tústi.
Bıyl Azıa – Tynyq muhıt aımaǵynan komandalyq álem chempıonatynyń fınaldyq satysyna úsh joldama beriledi. Fınaldyq kezeń jazda Chehıanyń Prosteev qalasynda ótedi.