Egemendigimizdiń máńgilik úshtaǵany – Altaıdan Atyraýǵa, Alataýdan Arqaǵa deıin keń kósilgen baıtaq jerimiz, ananyń aq sútimen boıymyzǵa daryǵan qasterli tilimiz jáne barlyq qıyndyqtardan halqymyzdy súrindirmeı alyp kele jatqan bereke-birligimiz. Biz osy úsh qundylyqty kózdiń qarashyǵyndaı saqtaımyz.
Qasym-Jomart TOQAEV.
QAZAQSTAN RESPÝBLIKASYNYŃ 50 HALYQARALYQ BASTAMALARYNAN
2011 jylǵy bastamalar:
- Mamyr: «G-GLOBAL» jobasy – jahandyq aqparattyq-kommýnıkasıalyq alań;
- Shilde: QR-nyń MAGATE-ge Qazaqstan aýmaǵynda Halyqaralyq az baıytylǵan ýran bankin ornalastyrýǵa resmı tapsyrysy berildi;
- Qyrkúıek: Jalpyǵa ortaq ıadrolyq qarýsyz álem deklarasıasyn ázirleý týraly usynys. – Elbasy N.Á. Nazarbaevtyń BUU Bas Assambleıasynyń 66-shy sesıasynda sóılegen sózi;
- Qazan: «Jasyl kópir» seriktestik baǵdarlamasy – BUU Bas Assambleıasynyń 66-shy sesıasyndaǵy QR bastamasy.
2011 jyl – el Táýelsizdiginiń 20 jyldyǵymen sıpattalady. Jyl «Beıbitshilik men jasampazdyqtyń 20 jyly» urany aıasynda ótti. 2010 jyldyń jeltoqsan aıyndaǵy Shyǵys Qazaqstan óńirindegi bastamashyl toptyń Memleket basshysynyń ókilettigin uzartý jóninde referendým ótkizý týraly bastamasy 2011 jyly qyzý jalǵasyn tapty. Qazaqstandyqtar jer-jerde bul ıdeıaǵa jappaı qoldaý bildirip jatty, bar-joǵy bir aı merzimde elimizdegi saılaýshylardyń jalpy sanynyń jartysynan astamy – bes mıllıonnan asa adam bul usynysty jaqtap daýys berdi. Parlament depýtattary da óz saılaýshylarynyń amanatyn qup aldy, azamattardyń talap-tilegin zańnamalyq turǵyda rásimdedi. Memleket basshysy bul usynystan bas tartatynyn málimdedi. Alaıda, 14 qańtar kúni Parlament, Nursultan Nazarbaevtyń kelisiminsiz, Konstıtýsıaǵa referendým arqyly Prezıdent ókilettigin 2020 jylǵa deıin uzartýdy kózdeıtin túzetýler engizý sheshimin biraýyzdan qabyldap jiberdi. Memleket basshysy bul túzetýlerge qol qoımaǵanyn aıtqan jón. Nátıjesinde túpkilikti mámilege kelý úshin sheshim Qazaqstan Respýblıkasy Konstıtýsıalyq keńesiniń qaraýyna jiberildi. Osy taǵdyrsheshti sát týraly Nursultan Nazarbaev jyldar óte kele bylaısha eske alady: « ...Mámile – saılaý ótkizý. Referendým ótkizýge baılanysty qol jınaýǵa qatysqandardyń bárine alǵysym men qurmetimdi bildire otyryp, men sonda da bolsa saılaýǵa qatysýdy qup kóretinimdi, biraq túpkilikti sheshimdi Konstıtýsıalyq keńestiń tujyrymynan keıin qabyldaıtynymdy aıttym. Eń bastysy, men sol sátte halyqtyń tilegin uqtym, «qyzmetti tastap ketpeımin, jumysty ári qaraı jalǵastyramyn» dep sheshtim. Sóıtip, halyqtyń mundaı biraýyzdylyǵy saqtalǵan jaǵdaıda, el úshin qansha qajet bolsa, sonsha ýaqyt jan aıamaı eńbek etýge bel baıladym. 31 qańtarda Konstıtýsıalyq keńes túzetýlerdi Konstıtýsıaǵa qaıshy keledi dep tapty. Konstıtýsıalyq keńestiń tujyrymyna jáne naqty saıası ahýalǵa súıene otyryp, men halyqqa arnaǵan sózimde merziminen buryn prezıdenttik saılaý ótkizýdi usyndym. Kezekten tys saılaýdy 2011 jyldyń 3 sáýirine belgilegen Jarlyqqa 4 aqpan kúni qol qoıdym. Saılaý barysynda meniń básekelesterim – Qazaqstan patrıottary partıasynyń tóraǵasy Ǵ. Qasymov, Qazaqstannyń komýnıstik halyqtyq partıasy OK hatshysy J. Ahmetbekov jáne «Tabıǵat» ekologıalyq uıymynyń kóshbasshysy M.Eleýsizov boldy. 2011 jyldyń 3 sáýirinde ótken Prezıdent saılaýynda saılaýshylardyń 95,55 prosenti meniń kandıdatýramdy qoldap daýys berdi. Ortalyq saılaý komısıasynyń málimeti boıynsha, daýys berýge saılaýshylardyń 89,98 prosenti qatysqan. Táýelsizdik dáýiriniń tarıhynda tuńǵysh ret qol jetkizilgen osyndaı aıqyn basymdyqty men otandastarymnyń ózime júk- tegen qosymsha jaýapkershiligi dep qabyldadym».
Táýelsizdigimizdiń jıyrmasynshy jylynda, 30 qańtar men 6 aqpan aralyǵynda Qazaqstanda ótken VII Qysqy Azıa oıyndary tarıhqa aıshyqty oqıǵa retinde endi. Oǵan 27 elden kelgen 1 myńnan astam sportshy qatysty. Qurlyqtyq jarysta Qazaqstan 32 altyn, 21 kúmis, 17 qola medaldy oljalap, komandalyq esepte birinshi oryndy enshiledi.
Bul jyldyń este qalǵan oqıǵalaryn tizbelesek, aqpan aıynda Prezıdent Qytaı Halyq Respýblıkasyna resmı saparmen bardy, elimizde qabyldanǵan «Ǵylym týraly» Zań ozyq ǵylymı jetistikter úshin jańa múmkindikter ashty. Mamyr aıynda Din isteri jónindegi agenttiktiń qurylýy mýltıkonfessıalyq Qazaq Eli úshin mańyzdy qadam boldy.Al, qazan aıynda «Dinı qyzmet jáne dinı birlestikter týraly» Zań qabyldandy. Maýsym aıyndaǵy QHR Tóraǵasy Hý Szıntaonyń Qazaqstanǵa resmı sapary nátıjesinde eki el arasyndaǵy Jan-jaqty strategıalyq áriptestik týraly Birlesken deklarasıaǵa qol qoıyldy.
2011 jyldyń taǵy bir jańalyǵy –Qazaqstan, Reseı jáne Belorýssıa elderiniń arasynda Kedendik Odaq paıda boldy. Taraptar keler jyly Eýrazıalyq ekonomıkalyq keńistikti qurý jaıly kelisimge keldi. Almaty qalasynda 1 jeltoqsan kúni metropolıten paıdalanýǵa berildi. Al, 14 jeltoqsan kúni Parlament Senatynyń saltanatty jaǵdaıda ótken jıynynda Prezıdentke Qazaqstan Respýblıkasy Táýelsizdiginiń 20 jyldyǵyna arnalǵan tósbelgi tabys etildi. Elimizde taǵy bir mereke paıda boldy. Aldaǵy jyldan bastap 1 jeltoqsan –Tuńǵysh Prezıdent kúni dep belgilendi.
2011 JYLDYŃ BASTY OQIǴALARY
- Nursultan Nazarbaevtyń Qazaqstan halqyna Joldaýy
- QR Prezıdentiniń ókilettigin uzartý jónindegi respýblıkalyq referendým.
- QR Prezıdentiniń saılaýy.Nursultan Nazarbaevtyń jeńisi.
- QR Táýelsizdigine – 20 jyl!
- Dúnıejúzi qazaqtarynyń İV Quryltaıy.
JYL URANY: «BEIBİTSHİLİK MEN JASAMPAZDYQTYŃ 20 JYLY»
18 qańtar
Nursultan Nazarbaev DVB –S2 standartyndaǵy otandyq spýtnıktik teleradıo habarlaryn taratý jelisiniń saltanatty ashylýyna qatysyp, otandyq telearnalardyń kórsetilimin iske qosty.
27 qańtar
2011 jyldy Qazaqstan Respýblıkasy Táýelsizdiginiń 20 jyldyǵy jyly dep jarıalaý týraly Prezıdent Jarlyǵy (№ 1144) jarıalandy. Jarlyqqa sáıkes, 2011 jyl – Qazaqstan Respýblıkasy Táýelsizdiginiń 20 jyldyǵy jyly dep jarıalandy. Jyl urany – «Beıbitshilik men jasampazdyqtyń 20 jyly» bolyp belgilendi. Mereıtoıdy merekeleýdiń tujyrymdamasy bekitildi.
28 qańtar
Memleket basshysy Qazaqstan Respýblıkasy Parlamenti palatalarynyń birlesken otyrysynda óziniń « Bolashaqty birge qalaımyz!» atty Qazaqstan halqyna dástúrli Joldaýyn jarıa etti.
30 qańtar
2010 jyldyń 31 jeltoqsany – 2011 jyldyń 7 qańtary aralyǵynda Nur-Sultan men Almaty qalalarynda VII Qysqy Azıa Oıyndary ótti. Azıadada qazaqstandyqtar 70 medal, onyń ishinde 32-altyn, 21-kúmis, 17-qola medaldardy ıelenip, qysqy Azıada oıyndarynyń tarıhynda jańa rekord ornatty.
4 aqpan
«Qazaqstan Respýblıkasy Prezıdentiniń kezekten tys saılaýyn taǵaıyndaý týraly» Prezıdent Jarlyǵy jarıalandy. 11 aqpanda Nursultan Nazarbaev Qazaqstan Respýblıkasy Prezıdenttigine úmitker bolyp usynyldy.
21-22 aqpan
Memleket basshysy Qytaı Halyq Respýblıkasyna memlekettik saparmen bardy. Nursultan Nazarbaev pen QHR Tóraǵasy Hý Szıntaonyń kezdesýinde birqatar mańyzdy qujattarǵa qol qoıyldy.
5 naýryz
Nur-Sultandaǵy Táýelsizdik saraıynda Qazaqstan Respýblıkasy Táýelsizdiginiń 20 jyldyǵy aıasynda Qazaqstan áıelderiniń sezi ótti. Oǵan Elbasy qatysyp, sóz sóıledi.
17 naýryz
Qazaqstan Prezıdenti jumys saparymen Reseı Federasıasyna bardy. Sapar barysynda Elbasy Reseı Prezıdenti Dmıtrıı Medvedevpen kelissóz júrgizdi.
1 sáýir
Nursultan Nazarbaev EQYU Parlamenttik assambleıasynyń Bas hatshysy Robert Spenser Olıver men Parlamenttik assambleıa delegasıasynyń basshysy, EQYU-nyń qysqa merzimdi baıqaýshylarynyń arnaıy úılestirýshisi Tonıno Pısýlany qabyldady.
3 sáýir
Qazaqstan Respýblıkasy Prezıdentiniń kezekten tys saılaýy ótip, onyń qorytyndysy boıynsha daýys berýge qatysqan saılaýshylardyń 95,55 paıyz daýysyn ıelengen Nursultan Nazarbaev jeńiske jetti. 4-sáýirde «Qazaqstan» sport kesheninde 5000 adam qatysqan «Kóshbasshymen birge alǵa!» atty jeńimpazdar forýmy ótti. 8-sáýirde Astanadaǵy Táýelsizdik saraıynda Prezıdenttiń óz qyzmetine resmı kirisýine arnalǵan ulyqtaý rásimi boldy. Saltanatty rásimde Nursultan Nazarbaev Ata Zańymyzdyń 42-babyna sáıkes: «Qazaqstan halqyna adal qyzmet etýge, Qazaqstan Respýblıkasynyń Konstıtýsıasy men zańdaryn qatal saqtaýǵa, azamattardyń quqyqtary men bostandyqtaryna kepildik berýge, Qazaqstan Respýblıkasy Prezıdentiniń ózime júktelgen mártebeli mindetin adal atqarýǵa saltanatty túrde ant etemin!» dep Qazaqstan halqyna ant berdi.
18 sáýir
19 sáýir
Kıevte Chernobyl AES-indegi apatqa 25 jyl tolýyna baılanysty atom qýatyn qaýipsiz jáne ınovasıalyq maqsatta paıdalaný máselelerine arnalǵan samıt ótti. Onyń jumysyna qatysqan Nursultan Nazarbaev samıt aıasynda BUU Bas hatshysy Pan Gı Mýnmen, Eýropa komısıasynyń prezıdenti Joze Barrozýmen,Ýkraına prezıdenti Vıktor Ianýkovıchpen kezdesti.
3 mamyr
Elordadaǵy Táýelsizdik saraıynda «Jańa onjyldyq: bolashaqtar men talaptar» taqyrybymen IV Astana ekonomıkalyq forýmy ashyldy. Oǵan dúnıe júziniń 80 elinen úsh myńnan astam delegat,olardyń ishinde Nobel syılyǵynyń alty laýreaty qatysty.
18 mamyr
Nur-Sultanda Elbasynyń tóraǵalyǵymen «Qazaqstandyq kásiporyndardy jańǵyrtý jáne jańartý» taqyrybynda QR Prezıdenti janyndaǵy Shetel ınvestorlary keńesiniń 24-shi plenarlyq basqosýy ótti.
25 mamyr
Elordadaǵy Táýelsizdik saraıynda Memleket basshysynyń qatysýymen Dúnıe júzi qazaqtarynyń İV quryltaıynyń saltanatty ashylýy boldy. Alqaly jıynda Nursultan Nazarbaev «Qazaqstan – dúnıedegi ár qazaqtyń qasterli qubylysy» taqyrybynda sóz sóıledi.
8 maýsym
Elbasy Nursultan Nazarbaevtyń qatysýymen Nur-Sultanda VII Búkilálemdik Islam ekonomıkalyq forýmynyń saltanatty ashylý rásimi boldy. Forýmǵa Islam áleminiń elýge jýyq elinen delegattar keldi, Islam halyqaralyq uıymdarynyń kórnekti ókilderi, saıası jáne qoǵam qaıratkerleri, belgili ǵalymdar men sarapshylar, iri kásipkerler qatysty.
13 maýsym
Memleket basshysy Qazaqstanǵa memlekettik saparmen kelgen Qytaı Halyq Respýblıkasynyń Tóraǵasy Hý Szıntaony qabyldady. Qazaqstan men Qytaı memleketteri yntymaqtastyǵynyń ózekti máseleleri jóninde pikir almasyldy. Bul Qytaı basshysynyń Qazaqstanǵa jasaǵan 7-shi sapary bolsa, ekijaqty 25-shi basqosý edi.
15 maýsym
Astanadaǵy Táýelsizdik saraıynda Shanhaı yntymaqtastyq uıymyna múshe memleket basshylary keńesiniń basqosýy ótti.Uıymnyń on jyldyq mereıtoıyna arnalǵan samıtte ótken on jyl ishindegi SHYU qyzmetine taldaý jasaldy jáne damý perspektıvalary aıqyndaldy. Osy kezdesýde Nursultan Nazarbaev tóraǵa retinde, áriptesterine beıbitshilikti damytýdyń negizgi baǵyttaryna saı ári Uıymnyń birneshe qurylymyn ashýdy qarastyratyn «SHYU-nyń meıirimdi bes isi» dep atalatyn bes ońtaıly maqsat usyndy. Olar – Qaqtyǵystardy retteý keńesi (óńirdegi qaýipsizdikti qamtamasyz etý úshin), Qurylymdyq yqpaldastyq jónindegi komıtet (qubyrlar júıesi men elektr jelileri boıynsha), Sý jáne azyq-túlik komıteti, Tótenshe jaǵdaılar boıynsha keńes, SHYU boljam jasaý ortalyǵy. SHYU qyzmetin kúsheıtýdegi Qazaqstannyń mańyzdy bastamalaryn kezdesýge qatysýshylar zor yqylaspen jáne qyzyǵýshylyqpen qabyldady.
28–30 maýsym
Nur-Sultanda Islam konferensıasy uıymy Syrtqy ister mınıstrler keńesiniń 38-sessıasy ótti. Oǵan múshe-memleketter «yntymaqtastyq» uǵymy uıymnyń aldaǵy ýaqyttaǵy atqaratyn jumystarymen kóbirek sáıkesetindigi týraly Qazaqstannyń pikirine qulaq asty. Osylaısha, Qazaq Elinde Islam áleminiń basty qurylymy óziniń qazirgi – Islam yntymaqtastyǵy uıymy (IYU) ataýyn ıelendi. Qazaqstannyń 2011–2012 jyldary IYU-ǵa tóraǵalyǵy – uıym tarıhyndaǵy jahandyq órkenıetti jáne dinaralyq dıalogta Qazaqstan róliniń mańyzdylyǵyn tanytqan kezeń.
2 tamyz
Memleket basshysy Almatyda qurylysy júrip jatqan metro nysanyn aralady. İske qosý sharasyna qatysqan Prezıdent «Abaı» jáne «Jibek joly» stansalary aralyǵyndaǵy baǵytty júrip ótti, metro qyzmetiniń sapasy men azamattardyń qaýipsizdigi máselelerine aıyryqsha kóńil bólý qajettigin tapsyrdy.
12 tamyz
Ujymdyq qaýipsizdik týraly shart uıymyna múshe memleketter basshylary Elordada beıresmı jaǵdaıda bas qosty. Alqaly basqosýǵa Qazaqstan Prezıdenti Nursultan Nazarbaev, Reseı Prezıdenti Dmıtrıı Medvedev, Belarýs Prezıdenti Aleksandr Lýkashenko, Qyrǵyzstan Prezıdenti Roza Otýnbaeva, Tájikstan Prezıdenti Emomalı Rahmon, Armenıa Prezıdenti Serj Sargısán qatysty.
30 tamyz
Qazaqstan Respýblıkasynyń 20 jyldyǵy men Konstıtýsıa kúnine oraı Astanadaǵy «Qazaq eli» monýmenti aldynda Elbasy – Qazaqstan Respýblıkasy Qarýly Kúshteriniń Joǵarǵy Bas qolbasshysy Nursultan Nazarbaevtyń qatysýymen áskerı sherý boldy.
22 qyrkúıek
BUU Bas Assambleıasynyń 66-sessıasy ótti. Osy sapary barysynda Memleket basshysy jalpy pikirtalasqa jáne Iadrolyq qaýipsizdik jónindegi joǵary deńgeıdegi kezdesýge qatysty. Sesıanyń kún tártibinde qaralǵan máseleler: memleketaralyq qatynastardyń quqyqtyq negizderin nyǵaıtý, aımaqtyq qaqtyǵystardy retteý, jappaı qyryp-joıatyn qarýdy taratpaý, jańa qaýip-qaterlerge qarsy turý, jahandyq basqarý júıesin reformalaý, turaqty damýdy qamtamasyz etý, azyq-túlik pen energetıkalyq qaýipsizdikti qamtamasyz etý jáne klımattyń ózgerýimen kúres. Qazaqstan Prezıdenti Iadrosyz álemniń jalpyǵa ortaq deklarasıasyn ázirleý ıdeıasyn usyndy. Onyń ıadrolyq qarýsyzdaný, jahandyq ekonomıkalyq basqarý, aqparattyq qaýipsizdik salalaryndaǵy birqatar bastamalary álem basshylary tarapynan qoldaý tapty. Elbasy birqatar eldiń basshylarymen jáne BUU Bas hatshysy Pan Gı Mýnmen kezdesti. Nursultan Nazarbaev ıadrolyq qaýipsizdiktiń úsh túrli artyqshylyǵyn atap kórsetti. Birinshi - áskerı-saıası aspektisi – adamzatty ıadrolyq qarýdan qorǵaý. Ekinshi – kez kelgen ıadrolyq terorızmge qarsy turý. Úshinshi – atom energetıkasynyń qaýipsizdigi.
12 qazan
Elordadaǵy Táýelsizdik saraıynda memleket basshysynyń qatysýymen «Iadrosyz álem úshin» atty halyqaralyq forým ashyldy. Oǵan BUU, MAGATE, EQYU, SHYU, UQSHU, EýrAzEQ, AÓSSHK, IýNESKO, IaSJTKU sekildi bedeldi de tanymal halyqaralyq uıymdardyń basshylary men ókilderi, sarapshylar men ǵalymdar - barlyǵy 400-den astam adam qatysty. Forým aıasynda Iadrolyq qarýsyz álem Deklarasıasy qabyldandy.
6 qarasha
Memleket basshysy «Tórtinshi shaqyrylǵan Qazaqstan Respýblıkasy Parlamentiniń Májilisin taratý jáne Qazaqstan Respýblıkasy Parlamenti Májilisi depýtattarynyń kezekten tys saılaýyn taǵaıyndaý týraly» Jarlyqqa qol qoıdy. Májilis depýtattaryn saılaý 2012 jyldyń 15 qańtaryna belgilendi.
18 qarasha
Reseı astanasy – Máskeý qalasynda Nursultan Nazarbaevtyń qatysýymen Joǵary Eýrazıalyq ekonomıkalyq keńestiń 1-shi otyrysy boldy jáne Keden odaǵyna múshe memleketter basshylarynyń kezdesýi ótti.
14 jeltoqsan
Nur-Sultanda Táýelsizdigimizdiń 20 jyldyǵyna arnalǵan saltanatty jıyn ótti. Osy jıynda Nursultan Nazarbaevqa «Elbasy» keýde belgisi tapsyryldy.
STATISIKA:
2011 jyly Prezıdent respýblıka óńirlerine 28 ret, shet elderge 16 ret resmı saparǵa shyqty. Bir jyl ishinde barlyǵy 148 Zań qabyldanyp, 254 Jarlyqqa qol qoıyldy.Elbasy halyqaralyq sıpattaǵy 165 kezdesýler men sharalarǵa, 15 memleketaralyq samıtter men halyqaralyq forýmdarǵa qatysty. 36 baspasóz konferensıalary men brıfıńter ótkizdi ,baǵdarlamalyq sıpattaǵy eki maqala jarıalady, sheteldik, otandyq 14 buqaralyq aqparat quraldary ókilderine suhbat berdi.
Bul jyly Qazaq Eli sporttyq iri dodanyń otanyna aınaldy, saıasatta da dúbirli oqıǵanyń ortalyǵy boldy - búkil álemniń nazaryn aýdarǵan Qysqy Azıa oıyndaryn, Shanhaı yntymaqtastyq uıymynyń mereıtoılyq samıtin abyroımen ótkizdi.
Jalpy,2011 jyl elimizde Táýelsizdiktiń 20 jyldyǵy aıasynda ótti.
TÚIİN:
26 jeltoqsanda Aqordada memleket basshysy Nursultan Nazarbaevtyń tóraǵalyǵymen ótken keńeste elimizde 2011 jyly atqarylǵan jumystar aldyn ala qorytyndylandy. Prezıdent aıtqandaı 2011 jyl óte mańyzdy, erekshe jáne tabysty boldy. Qazaqstan el Táýelsizdiginiń 20 jyldyǵyn jaqsy kórsetishtermen aıaqtady. Jalpy ishki ónimniń naqty ósimi jyldyń qorytyndysy boıynsha 7,3 paıyzdy qurady. Jyl aýyl sharýashylyǵy úshin tabysty boldy - ónim ósiminiń kólemi ótken jylmen salystyrǵanda 25,5 paıyzdy, al qurylys salasynda – 3 paıyzǵa derlik, ónerkásipte – 4 paıyzǵa jýyq kórsetkishti qurady, saýda men kólik salalarynda da ósim boldy. Prezıdent Indýstrıalandyrý kartasyna 9,6 trıllıon teńgeni quraıtyn 609 joba engizilgenin atap kórsetti. Eki jyldyń ishinde nysandardy iske qosýdyń esebinen 90 myń jańa jumys orny qurylǵan. Myńdaǵan adamdar tıisinshe tabys pen joǵary bilikti jumysqa ıe boldy. Buryn Qazaqstanda eshqashan ónim shyǵaryp kórmegen 106 óndiris ıgerildi. Memleket basshysynyń tapsyrmasy boıynsha turǵyn úı qurylysy baǵdarlamasy iske asyryla bastady. 389 nysan boıynsha 53 myń úleskerlerdiń problemasy sheshimin tapty. Bul zor máni bar memlekettik sheshim boldy.
Elbasy sondaı-aq áleýmettik salada oń nátıjelerge qol jetkizilgenin atap ótti. Jumyssyzdyq deńgeıi 5,3 paıyzǵa deıin tómendedi. 2011-2015 jyldarǵa arnalǵan «Salamatty Qazaqstan» densaýlyq saqtaýdy damytý memlekettik baǵdarlamasy júzege asyryla bastady. Bul baǵdarlamada ana men bala ólimin, aýrý deńgeıin tómendetý jóninde naqty ındıkatorlar qamtylǵan. Sonymen birge mereıtoılyq jyl ekonomıkanyń odan ári jyldam ósimi men halyqtyń ómir súrý deńgeıiniń artý jyly bolǵanyn atap ótti Prezıdent.