QR İİM Ulttyq ulany Almaty qalasy bilim basqarmasynyń №166 lıseıimen kelisimge qol qoıdy. Onyń aıasynda áskerı qyzmetshiler tárbıe jumystary men patrıottyq is-sharalarǵa belsendi qatysatyn bolady.
Birlesken bastama jastardyń boıynda óz eli úshin maqtanysh sezimin qalyptastyrýǵa, quqyq qorǵaý salasy qyzmetiniń mártebesin kóterýge jáne áskerı mansabyn dáripteýge baǵyttalǵan.
Jańa kelisim boıynsha ótkizilgen alǵashqy is-shara barysynda «Ońtústik» óńirlik qolbasshylyǵynyń ofıserleri lıseıdiń 9-11 synyp oqýshylarymen kezdesti. Onda Otandy qorǵaýdyń, áskerde qyzmet etýdiń mańyzdylyǵy men quqyq tártibi áskerleri qatarynda qyzmet etý múmkindikteri talqylandy. Sondaı-aq, oqýshylarǵa QR İİM Ulttyq ulan Akademıasyndaǵy oqý júıesi týraly aıtyldy.
– Mektep qabyrǵasynan bastap patrıottyq tárbıe bergen jón. Búginde basty mindetterdiń biri – memleketimizdiń qaýipsizdigin qamtamasyz etý. Bizdiń bolashaǵymyz jastardyń qolynda. Mundaı yntymaqtastyq oqýshylarǵa qaýipsizdik pen qoǵamdyq tártipti qamtamasyz etýdegi Ulttyq ulannyń rólin jaqsy túsinýge kómektesetin azamattyq-patrıottyq tárbıe baǵdarlamasynyń bir bóligine aınaldy, – dedi 5571 áskerı bólim komandıriniń tárbıe jáne áleýmettik-quqyqtyq jumystar jónindegi orynbasary podpolkovnık Ulyqbek Qaraev.