Almaty qalasynyń ákimi Darhan Satybaldy jumys saparymen Túrksib aýdanyna baryp, «Jas Qanat» shaǵynaýdanynyń turǵyndarymen kezdesti. Jergilikti halyq abattandyrý jumystary úshin qala basshysyna rızashylyq bildirdi.
Turǵyndardyń ótinishi boıynsha turǵyn úı kesheniniń aýmaǵynda zamanaýı balalar oıyn alańy men túrli oıyn jáne sporttyq jabdyqtar ornatylǵan. Sondaı-aq, keń fýtbol alańy salyndy. Buǵan qosa, joba aıasynda jastar men eresekterge arnalǵan demalys aımaǵy jasaqtalyp, jaıaý júrginshiler joldary tóselip, oryndyqtar men demalys oryndary qoıyldy.
«Ótken joly ózderińiz munda «oınaıtyn, demalatyn oryn joq» dep aıtqan edińizder. Balalar da kelip, oıyn alańyn suraǵan edi. Aıta keteıin, bul qurylysqa búdjet qarjysy jumsalǵan joq. Joba kásipkerlerdiń qoldaýymen júzege asty», — dedi qala ákimi.
Óz kezeginde «Jas Qanat» TÚK turǵyndary atqarylǵan jumysqa rızashylyq bildirdi: «Balalar alańyn salý kezinde barlyq usynysymyz ben eskertýimiz eskerildi. Endi balalarymyz asyr salyp oınap, fýtbolmen aınalysyp júr. Bizge bári unaıdy!» — dedi olar.
Sapar barysynda qala ákimi turǵyn úı keshenindegi ózge de aýlalardy aralap kórdi. Turǵyndar gaz tartý, jaryqtyń úzilissiz berilýi, kireberister men shatyrlardyń jaǵdaıy, sondaı-aq, PIK qyzmetine qatysty máselelerdi kóterdi. Bul túıtkilderdi sheshý úshin Almaty ákimi naqty tapsyrmalar berdi: «Qurylys basqarmasyna komýnaldyq ınfraqurylymdy damytý basqarmasymen jáne aýdan ákimdigimen birlesip turǵyndarmen, PIK tóraǵasymen jáne «AlmatyEnergoSbyt» ókilderimen ortaq jınalys ótkizip, elektrmen jabdyqtaý, jedel satylardy kútip ustaý men basqa da komýnaldyq túıtkilderdi sheshýdi tapsyramyn», — dedi Darhan Satybaldy.
Sonymen qatar ákimniń tapsyrmasymen turǵyn úı kesheniniń ishki aýlalaryna asfált tóselip, jol belgileri ornatylady. Barlyq jumys turǵyndardyń pikiri eskerile otyryp júrgiziledi.
Buǵan qosa, Darhan Satybaldy «Jas Qanat» pen «Maıak» shaǵynaýdandarynyń aýmaǵyndaǵy 100 gektardan asatyn «Jeltoqsan» parkiniń abattandyrylý barysymen de tanysty. Demalys aımaǵyna Áýejaı kóliniń jaǵalaýy kiredi, jasyl jelek aýmaǵy shamamen 23 myń sharshy metr. Saıabaq aımaǵyn kútip-ustaý jáne abattandyrý elementterin qalpyna keltirý boıynsha merdiger uıym anyqtalǵan.
Búginde saıabaq aýmaǵynda sýarý júıesin ornatý jumystary jalǵasyp jatyr. Buǵan deıin syrtqy jaryqtandyrý jelileri men basqarý shkaftary ornatylǵan bolatyn. Qala ákimi saıabaqtaǵy jaryq júıesiniń úzdiksiz jumys isteýin qamtamasyz etip, sýarý júıesin belgilengen merzimde tolyq aıaqtaýdy tapsyrdy.