Búgin Almatyda «Jarqyn kúz» qalalyq naýqany aıasynda Baým toǵaıynda tazalaý jáne kógaldandyrý is-sharalary ótti, dep habarlaıdy aqshamnews.kz
Aksıaǵa qalanyń ekologıa jáne qorshaǵan ortany qorǵaý basqarmasynyń ókilderi, «Medeý» memlekettik óńirlik tabıǵı parki, eko-belsendiler jáne turǵyndar qatysty.
«Mundaı aksıalar óte qajet, tazalaý jumystarynan bólek, biz kógaldandyramyz. Qalamyzdyń saıabaqtary men skverleri – negizgi ottegi kózderi, sondyqtan olardy qorǵaýymyz kerek», – dedi Bostandyq aýdanynyń qorshaǵan ortany qorǵaý bólimi basshysy Arsen Aıdynbekov.
Aksıa Qazaqstandaǵy Orman sharýashylyǵy qyzmetkerleri kúnimen tuspa-tus keldi. Bul mereke jyl saıyn qazan aıynyń úshinshi jeksenbisinde atap ótiledi. Qyzmetinde erekshelengen vedomstvo qyzmetkerleri kásibı merekesi qarsańynda alǵys hattarmen marapattaldy.
«Tabıǵatqa, qorshaǵan ortaǵa qamqorlyq jasaý – bizdiń mindetimiz. Tabıǵatty bolashaq urpaq úshin saqtap qalý úshin bar kúshimizdi salamyz», – dedi ormanshy Qýandyq Dáýletıarov.
«Jas Eko Patrúl» jáne «Jasyl el» jastar ekologıalyq jasaqtarynyń jetekshisi Ádil Nurpeıisov almatylyqtardy megapolıstiń eń iri jasyl jeleginiń birin saqtap qalýǵa belsendi qatysýǵa shaqyrdy. «Jyl basynan beri biz qala bıligimen birlese otyryp, 30-ǵa jýyq ekoaksıa ótkizdik. Osyndaı aýqymdy aksıada árbir azamattyń úlesi mańyzdy», – dedi ekobelsendi.
Baým toǵaıynyń janynda turatyn almatylyq Irına Pavlova aksıa týraly «Medeý» saıabaǵynyń qyzmetkerlerinen estigen. «Baým toǵaıynda 2000 jyldardan beri únemi serýendeımin, buryn bul aýmaq qaraýsyz qalǵan edi, munda júrýdiń ózi qorqynyshty bolatyn. Biraq sońǵy jyldary aıtarlyqtaı jaqsardy, sondyqtan men týǵan qalamyz Almatynyń aýmaǵyn tazalaý aksıasyn qoldaımyn», – dedi Irına Pavlova.
Eske sala keteıik, Almatyda «Taza Qazaqstan» respýblıkalyq baǵdarlamasy men «Almaty – bizdiń ortaq úıimiz» qalalyq naýqany aıasynda 18-24 qazan aralyǵynda halyq arasynda ekologıalyq mádenıetti qalyptastyrýǵa, qalany kóriktendirý men kógaldandyrýǵa baǵyttalǵan «Jarqyn kúz» aksıasy ótip jatyr.