Elimizde mektep oqýshylary arasyndaǵy jaratylystaný-matematıkalyq baǵyttaǵy pánder boıynsha respýblıkalyq olımpıada óz máresine jetti.
Oǵan elimizdiń óńirlerinen 939 oqýshy qatysty, dep habarlaıdy Almaty-akshamy.kz QR Oqý-aǵartý mınıstrliginiń baspasóz qyzmetine silteme jasap.
Bıylǵy jyly oqýshylarǵa arnalǵan respýblıkalyq olımpıada 6 óńirde bir mezgilde ótti. Jas matematıkter men fızıkter, hımıkter Astana, Almaty jáne Pavlodar qalalarynda baq synasty. Barlyq kezeń qorytyndysy boıynsha 431 oqýshy júldeger atandy, olar 211 qola, 131 kúmis jáne 89 altyn júldeni ózara bólisti.
«Eń jas qatysýshy» dıplomymen Aqmola oblysynan 8-synyp oqýshysy Nuráli Shaımerden marapattaldy.
«Men osy olımpıadaǵa qatysqanyma óte qýanyshtymyn. Respýblıkalyq olımpıada – meniń ıntellektýaldy damýym úshin úlken múmkindik. Men munda bilimimdi tolyqtyryp qana qoımaı, jańa dostar taptym», - deıdi óz áserimen bólisken Nuráli Shaımerden.
Al «Eń úzdik aýyl oqýshysy» nomınasıasy boıynsha Pavlodar oblysynan Maksım Komarov pen Jetisý oblysynan Vladıslav Ivanov dıplomdarǵa ıe boldy.
«Úzdik olımpıadalyq komanda» nomınasıasy kelesideı bóliniske tústi: III oryn - Shyǵys Qazaqstan, Qyzylorda jáne Jambyl oblystary; II oryn - Astana jáne Almaty qalalary; I oryn – Pavlodar oblysy jáne RFMM qurama komandasy. Bas júldeni Nazarbaev Zıatkerlik mektebiniń komandasy jeńip aldy.
Sonymen qatar 46 jeńimpazǵa KBTU, Q.Sátbaev atyndaǵy Qazaq ulttyq zertteý tehnıkalyq ýnıversıteti, Astana IT University, Q.Jubanov atyndaǵy Aqtóbe óńirlik ýnıversıteti, H.Dosmuhamedov atyndaǵy Atyraý ýnıversıteti sekildi JOO-na rektorlyq grant taǵaıyndaldy.
«Olımp shyńyna jeteleýshi» nomınasıasy boıynsha pedagog-tálimgerler men olımpıadalyq komandalardyń jattyqtyrýshylary marapattaldy.