Eki adamnyń bir daýys berý kabınasyna kirýi, eger oǵan dáleldi sebepter bolsa, tártip buzýshylyq bolyp tabylmaıdy. Máselen, týystary kózi nashar kóretin azamattarǵa daýys berýge kómektesýi múmkin. Bul týraly Almaty qalalyq referendým ótkizý jónindegi aýmaqtyq komısıasynyń tóraǵasy Janna Asanova málimdedi.
«Biz saılaýshylardyń tizimnen tabylmaýynyń sebepterin anyqtadyq. Atap aıtqanda, 99,9% jaǵdaıda adamdar jaı ǵana tizimnen shyǵarylǵan. Aıtalyq, adam týysqanynyń úıine tirkeldi, keıin páter ıesi ony tirkeýden shyǵaryp jibergen (zańǵa sáıkes, menshik ıesi muny isteı alady). Al tirkeýden shyǵarylǵan adam bul týraly habardar bolmaı shyǵady. Aıta ketý kerek, 3384545 nómiri arqyly tirkelý tarıhyn baqylaı alasyz. Jeke tulǵalardyń memlekettik derekter bazasynda kóshi-qon boıynsha barlyq aqparat bar», – dedi Janna Asanova.
Onyń aıtýynsha, múmkindigi shekteýli jandar senimdi adamnyń kómegin paıdalanýǵa quqyly. Máselen, bir kabınada eki saılaýshynyń bolǵan oqıǵa №529 saılaý ýchaskesinde oryn alǵan.
«Bul jaǵdaıda daýys berýge eki adam keldi – erli-zaıyptylar. Olardyń biri –soqyr. Ekeýi de osy aýdanda tirkelgen. Er adam ózine senetin adamnyń kómegin paıdalaný quqyǵyn beretin normany paıdalandy. Bul zań buzýshylyq emes», – dep túsindirdi Janna Asanova jaǵdaıǵa qatysty,
«Perdeniń ashyq bolýy zań buzýshylyq pa?» degen suraqqa Janna Asanova mundaı tájirıbe pandemıa kezinde bolǵanyn aıtty. Saılaýshy shymyldyqty óz qalaýy boıynsha asha alady nemese jaba alady. Bos kabınada shymyldyqtyń ashyq nemese jabyq bolýy boıynsha eshqandaı zań buzýshylyqtar joq.
Eske salaıyq, 1 mıllıon 126 myń 854 almatylyq referendýmda daýys berý quqyǵyna ıe bolsa, 1388 adam syrttaı daýys berý arqyly daýys beredi.