QAZAQ STYLE jáne bir jekpe-jek ótkizbek
Orta salmaqta WBO Global jáne WBC Continental Americas beldikterine ıe Jánibek Álimhanuly (10-0, 6KO) 5 qarashada jekpe-jek ótkizetinin aıtyp, málimdeme jasady, dep habarlaıdy Almaty-akshamy.kz
VKontakte áleýmettik jelisindegi «Qazaqstannyń kásipqoı boksy» paraqshasynda málim etilgendeı, Jánibek bıylǵy 5 qarashada Las-Vegasta tájirıbeli fransýz boksshysy Hassan Ndam Njıkamǵa (38-5, 21KO) qarsy jekpe-jek ótkizedi. Aıqas aldynda qazaqstandyq sportshy bokstaǵy óziniń biregeı stıli týraly taǵy bir márte málimdedi.
«Men basqalardan erekshelenemin jáne ony bári biledi. Mende basqa máner bar. Qazaq máneri — álemdegi eń úzdik máner. 5 qarashada men ony kórsetemin», - dep jazdy Jánibek Twitter-de.⠀
Álimhanuly óziniń sońǵy jekpe-jegin bıylǵy maýsym aıynda Las-Vegasta da ótkizgen bolatyn. Onda ol WBA Regular nusqasy boıynsha orta salmaqtaǵy eks-álem chempıony Rob Brantty (26-3, 18KO) merziminen buryn segizinshi raýndta jeńgen bolatyn.