Gúlbarshyn úıine jaqyndaý balabaqshada tárbıeshi bolyp isteıdi. Osy jumys orny oń jambasyna kele qaldy ózi. Sebebi, alyp qalada ekidegi qyzyn qushaqtap, bestegi ulyn jetegine alyp, avtobýsqa otyryp, odan kóligi aǵylǵan joldan ótip, balabaqshaǵa jetý de ońaı emes.
Ózderi páterde turady. Jary tańmen talasa erte turyp ketedi jumysyna. Sondyqtan oǵan «bizdi kóligińmen balabaqshaǵa jetkizip salmaısyń» dep renjýdiń reti joq. Tapqan-taıanǵandaryn ekeýlep «Otbasy bankine» salyp jatyr. Oıyna alǵan qarajattyń teń jartysyn jınasa, ata-enesi de kómektesemiz dep otyr. Eki balaǵa balabaqsha tóleminiń jartysyn ǵana tóleıdi. Balabaqsha qyzmetkerlerine óz ishinde sondaı jeńildik jasalǵan. Bul da bolsa jas otbasyna Qudaıdyń qaraılasqany. Solaı. Kóshten qalmaı, urpaq úshin osylaı tirshilik keship jatyr.
Búgin kún jańbyrly. Sebeleı jaýyp tur. Eki balamen qolshatyr ustaý qolaısyz. «Mine, jaqyn jer, jetip alamyn ǵoı» dep, bir jaǵynan sý bolyp qalmas úshin, ekinshi jaǵynan, balalardy qabyldap alý kerek, sondyqtan jumystan keshigip qalmas úshin ekpindete asyǵys júrip kele jatyr. Bir kezde qushaǵyndaǵy kishkentaı Asylym moınyn sozyp artyna buryla berdi qaıta-qaıta. Birdeńe dep byldyrlap sóılep qoıady. Oǵan mán berýge Gúlbarshynda shama joq. Eteginen ustap alǵan uly da súrinip ketip, qulap qala jazdady. Óziniń de qolaısyz aýa raıynda denesi aýyr tartyp júrisi mandymaı kele jatqan kelinshek:
– Qyzym, tynysh, qozǵalaqtaı berme, qazir sý bolamyz, tez jetip alaıyq, – dese de tyńdamaı, artyna buryla berdi.
Anasynyń myna ekpinimen toqtaı qoımaıtynyn bilgen búldirshin kishkentaı qolyn júrek tusyna aparyp, óz tilinde «Me-enim elim, me-enim elim!» dep Ánurandy shyrqaı jónelsin. Sóıtse, eki jastaǵy Asylym joldaǵy úlken ǵımarattyń ushar basynda jelbirep turǵan kók Týdy kórip qalyp, sony anasyna kórsetkisi kelip buryla bergen eken ǵoı artyna. Jas ananyń júregi eljirep ketti. Jaqsy urpaq tárbıelep jatqanyna, durys jolda kele jatqanyna qýandy.
Qazir jumysqa jetip, balalardy túgendep qabyldap alǵan soń, jumys kúni, ıaǵnı tań Ánuranmen bastalady. Baldyrǵandar Ánurannyń alǵashqy notasyn estigennen-aq oıynshyqtaryn tastaı salyp, oryndaryna ushyp-ushyp turyp, náp-názik qoldaryn keýde tusyna apara qoıyp, ádemi áýenge ilese jóneledi. Tap-taza jan dúnıesimen oryndaıdy olar. Patrıottyq sezim kishkentaı júrekterge de solaı ornyǵyp alǵan.
Ánuran demekshi, kúni keshegi mekteptegi sońǵy qońyraý kezindegi bir oqıǵa da áli kóz aldymda. Kenjem oqý ozaty atandy da, saltanatty is-sharaǵa ata-ana retinde men de baryp qatystym. Balamnyń qýanyshyna ortaqtasqym keldi. Bir kezde Memlekettik Ánuran bastaldy. Úlken-kishi siltideı tyna qalyp, keýdemizge qolymyzdy qoıyp, qosyla kettik.
Men sekildi mektepke kelgen bir ata-ana kishkentaı balasyn 9-10 jastardaǵy qyzyna tabystap ketken syńaıly, ózi kórinbeıdi, al álgi qyz bala qoldy-aıaqqa turmaı, aıaǵyn táı-táı basyp júrgen bópesiniń sońynan ol qaıda barsa sonda, sońynan salpaqtap júr. Bir qoly – sábıdiń jelke tusynda (qulap qalmasyn degeni), ekinshi qoly – óz júreginde, solaı Ánuranǵa qosylyp shyrqap júr. Sol sát «Eldi, Otandy súıýdi baladan da úırenýge bolady» degen oı keldi kókeıge.
Mine, bizdiń bolashaq!