S.J. Asfendıarov atyndaǵy Qazaq ulttyq medısına ýnıversıtetinde «Almaty – bizdiń ortaq úıimiz» ekologıalyq aksıasy ótti
Tabıǵattyń, tirshiliktiń jáne rýhanı jańarýdyń sımvoly Naýryz merekesi tek toı-dýmanmen ǵana emes, el ıgiligine arnalǵan ıgi istermen de jalǵasyp jatyr.
S.Asfendıarov atyndaǵy Qazaq ulttyq medısına ýnıversıtetiniń basshylyǵy, profesorlyq-oqytýshylyq quramy jáne stýdentteri «Jańarý kúni» bilim ordasynyń aınalasyn tazalap, senbilik ótkizdi. Bul shara elimizde ótkizilip jatqan «Almaty – bizdiń ortaq úıimiz» ekologıalyq naýqany aıasynda uıymdastyrylyp otyr.
Tazalyq jumystaryna erekshe belsendilik tanytqan bolashaq dárigerler qoldaryna tyrma, sypyrtqy, ketpen alyp, oqý ornynyń aýmaǵyn retke keltirdi. Qyzdar aýmaqty sypyryp, jigitter jınalǵan qoqystardy arnaıy qaptarǵa saldy. Senbilikke qatysýshylardyń aıtýynsha, qorshaǵan ortanyń tazalyǵy – qoǵamnyń densaýlyǵyna tikeleı áser etetin mańyzdy faktor.
Bul shara stýdentter arasynda ekologıalyq mádenıetti qalyptastyrýǵa, týǵan jerge degen súıispenshilikti arttyrýǵa jáne jaýapkershilikti sezinýge úlken yqpal etedi. Bilim alýshylardy qoldaý jáne damytý departamentiniń basshysy Shermet Sherzat Rozmetuly stýdentterdiń belsendiligin erekshe atap ótti:
– S.J. Asfendıarov atyndaǵy Qazaq ulttyq medısına ýnıversıtetiniń (QazUMÝ) stýdentteri men oqytýshylary uıymdastyrǵan is-shara – tek tazalyq sharasy ǵana emes, qorshaǵan ortany qorǵaýǵa degen jaýapkershiliktiń aıqyn kórinisi. Bul senbilik tek tazalyq jumystary ǵana emes, sonymen qatar urpaqtyń boıyna qorshaǵan ortaǵa degen janashyrlyqty sińirýdiń bir joly. Ýnıversıtetimizde ekologıalyq mádenıetti qalyptastyrýǵa erekshe kóńil bólinedi. Mundaı sharalar stýdentterdiń týǵan jerine degen súıispenshiligin oıatyp, patrıottyq rýhyn nyǵaıta túsedi, - deıdi ol.
Stýdentter oqý ornyna tıesili aýmaqty ǵana emes, qala kóshelerin, jaıaý júrginshiler jolyn, aryq júıelerin de tazalady. Bul aksıa tek qana tazalyq jumystarymen shektelmeı, jastarǵa ekologıalyq tárbıe berip, tabıǵatty aıalaý men qorshaǵan ortaǵa degen jaýapkershilikti qalyptastyrýǵa septigin tıgizdi. Ýnıversıtet ujymy aldaǵy ýaqytta da ekologıalyq is-sharalarǵa belsene qatysyp, qalamyzdyń kórkeıýine óz úlesin qosa bermek.