Oǵan dálel - 82 jastaǵy qarıa aǵylshyn tilin úırenip júr
Kentaý qalasynyń turǵyny Qurmanbek Daırabaı qartaıdym dep qarap otyrǵan joq. Kún saıyn qolyna kitap-dápterin alyp, aǵylshyn tilin úırenip júr. Aptasyna úsh ret tilderdi oqytý ortalyǵyna baryp, sabaqqa qatysady.
Osy kezge deıin ol 1500 sóz úırenipti. Birinshi deńgeıden ótken ol ary qaraı da til úırenýdi jalǵastyrý oıynda bar, dep habarlaıdy Almaty-akshamy.kz QazAqparatqa silteme jasap.
«Til úırený - búgingi kúnniń basty talaby. Eger qyzyǵýshylyq bolsa, bilim alý jas talǵamaıdy. Úıde nemerelerim bir-birimen aǵylshynsha sóılesedi. Ony men túsinbeımin. Sondyqtan tilge degen qyzyǵýshylyǵym oıandy. Ákimdikte tegin úıretetin mekeme de bar eken. Bardym. Alǵashqy kýrsty bitirdim. Qazir úıde nemerelerimmen aǵylshynsha sóılesetin kezderimiz kóp», - deıdi qarıa.
Kentaý qalalyq tilderdi oqytý ortalyǵynyń dırektory Aqmaral Ótepbaeva Qurmanbek aqsaqaldyń úzdik til úırenýshi bolǵandyǵyn aıtady.
«Atamyz sabaqqa oflaın qatysyp, aǵylshyn tilin nólden bastap úırendi. Qarapaıym frazalar men erejelerdi, oqý jáne jazýdy meńgerdi. Qazir aǵylshynsha qoıylǵan suraqtarǵa óz betinshe jaýap bere alady. Ol kisi til úırenýshilerdiń ishindegi eń belsendisi, tártiptisi bola bildi. Aptasyna úsh ret bolatyn sabaqtan birde-bir ret qalǵan emes», - deıdi ol.
Aqsaqal «A-1 – beginner» deńgeıin tolyq meńgerip, sertıfıkat alǵan. Aǵylshyn tilindegi sózderdi qurap oqı alady. Endi kelesi kezeń boıynsha sabaqtyń bastalýyn kútip júr.