Almaty oblysynyń ákimi Amandyq Batalov jańadan taǵaıyndalǵan aýdan ákimderiniń tyńdaýyn ótkizdi.
Oblys ákimi árbir jobany, nysandardy salý men jóndeý jumystaryn erekshe baqylaýda ustap, mereıtoılyq sharalardy ótkizýdiń usaq-túıegine deıin mán berýdi tapsyrdy.
Alǵashqylardyń qatarynda Jambyl, Talǵar, Alakól aýdandarynyń ákimderi josparlarymen bólisti. Raıymbek aýdanynyń ákimi aqıyq aqyn Muqaǵalı Maqataevtyń 90 jyldyǵyn ótkizý jóninde baıandady, - dep habarlaıdy Almaty-akshamy.kz Almaty oblysy ákiminiń baspasóz qyzmetine silteme jasap.
Mereıtoılyq data sheńberinde josparlanǵan sharalardyń aýqymdy bóligi aqynnyń týǵan aýyly Qarasazda áleýmettik nysandardy salý, jóndeý, abattandyrý jumystarymen baılanysty ekeni aıtyldy. Joldar jóndelip, kósheler jaryqtandyrylyp, saıabaqtar men skverler abattandyrylyp, kógaldandyrylady. Óner mektebi salyna bastaıdy. Sonymen qatar Raıymbek aýdanynyń Narynqol aýylynda aqynǵa eskertkish ornatylady. Mereıtoılyq sharalardyń negizgi bóligi qyrkúıek aıyna josparlanǵan.
Alakól aýdanynda týrızm men aýyl sharýashylyǵyn damytýǵa negizgi basymdyq beriledi. Eske salsaq, aýdanda qant zaýytyn qalpyna keltirý josparlanyp otyr.
«Sizdiń bastamańyzben qant zaýytyn iske qosqanda, 500 turaqty jumys orny ashylatyn bolady, ónerkásip óniminiń kólemi 3 esege ulǵaıady nemese 32 mlrd teńgege deıin jetedi. Qant zaýytyn qant qyzylshasy shıkizatymen qamtamasyz etý úshin 7 myń gektar jerge tátti túbir egýimiz kerek», - dedi aýdan ákimi Almas Abdınov.
Bul úshin sýarý júıelerin jańǵyrtýǵa qoldaý qajet. Búginde 360,2 km sharýashylyqaralyq sý qubyry júıelerin jóndeý úshin jobalyq-smetalyq qujattama ázirlengen. Osy jobany júzege asyrýdyń nátıjesinde sýarmaly jer alańy 5 myń gektarǵa ulǵaıady. Jalpy, bıylǵy jyly aýdannyń aýyl sharýashylyǵy salasyna 2,5 mlrd teńge ınvestısıa salý josparlanǵan. Ótken 5 aıda 830 mln teńge ınvestısıa tartylypty. Ónerkásip, týrızm, turǵyn úı qurylysy sıaqty baǵyttar da nazardan tys qalmaıdy.
Jambyl aýdanynyń ákimi Nurlan Ertas óz óńiriniń qalaı damıtyny jaıly baıandady. Aýdan eń aldymen agrarlyq baǵytta bolǵandyqtan, aýyl sharýashylyǵyn damytýǵa erekshe kóńil bólinedi. Sorbulaq jáne Bozoı massıvterin damytý esebinen egis alqaptarynyń kólemin ulǵaıtý, mal azyǵy bazasyn damytý, mal basyn kóbeıtý, mal ónimderin óńdeý damytylady. Aýdanda osy salalarǵa ınvestısıa tartylmaq. Josparlanǵan ınvestısıalyq jobalardyń ishinde jylyna 8 myń tonna kókónis ósiretin jylyjaı kesheni, qýaty 2 MVt GES jáne 100 MVt bolatyn kún elektr stansasynyń qurylysy bar. Qosymsha aýyl sharýashylyǵy salasyna kadrlar daıarlaý jumystary júrgizilýde. Qazirgi kezde Jambyl atyndaǵy Uzynaǵash kásiptik kolejiniń bazasynda «Jas maman» baǵdarlamasy aıasynda 2021-2022 oqý jylyna «Mehanızator» mamandyǵyna 25 stýdentti oqytý josparlanyp otyr.
Halyqtyń turmys sapasyn jaqsartý úshin sýmen, gazben jáne elektrmen qamtý jobalary, aýylishilik joldardy jóndeý, káriz júıeleriniń qurylysy jumystaryna qarjylyq qoldaý qajet. Sol sıaqty árqaısysy 150 oryndyq eki aýyldyq Mádenıet úıin salý, birqatar ákimshilik ǵımarattaryna kúrdeli jóndeý júrgizý, sáýlettik eskertkishterdi restavrasıalaý kerek. Beıbereket jınalǵan qoqysty joıý, ortalyq saıabaqty jańǵyrtý jumystaryna da aýdan ákimi kómek surady. Amandyq Batalov tıisti qoldaý kezeń-kezeńimen kórsetiletinin aıtty.
«Aýdannyń aǵymdaǵy áleýmettik-ekonomıkalyq damýyna tolyq taldaý jasap, basym baǵyttaryn aıqyndaǵan durys. Eń bastysy, osy jospardyń barlyǵy is júzinde oryndalýy kerek, sonda nátıjeniń jemisin halyq kóretin bolady. Aýdan ákiminiń óz mindetterine osylaı jaýapty qaraýy Jambyl aýdanyn aldyńǵy qatarly, irgeli, ekonomıkalyq qýatty aýdan etýge múmkindik beredi»,- dedi A. Batalov.
Talǵar aýdany ákiminiń kezekti baıandamasynan keıin Amandyq Batalov aýdan basshysy Qaıdar Abdyhanovqa aýdannyń damýyn jan-jaqty saralap, ındýstrıaldy baǵytqa basymdyq berýdi tapsyrdy.
«Jumysqa alǵash kiriskende, eń aldymen naqty jospar jasap, negizgi baǵyttardy belgilep alý kerek. Talǵar aýdanynyń ónerkásiptik áleýeti joǵary. Iaǵnı birinshi kezekte ınvestısıa tartýǵa, kásiporyndar ashýǵa, jańa jumys oryndaryn qurýǵa áreket jasaý kerek. Aýdan Almaty aglomerasıasyna kiredi, bul turǵyn úıge suranys joǵary degen sóz. Sondyqtan turǵyn úı salý josparlanǵan alańdardy der kezinde ınjenerlik komýnıkasıamen qamtamasyz etý kerek. Aýdanda halyq tyǵyz ornalasqan, sondyqtan qansha mektep salý kerek, qandaı áleýmettik nysandar qajet ekenin anyq bilýge tıissińder. Talǵar qalasyn sýmen qamtýdyń ózekti máselesin sheshýdiń tıimdi sharalaryn qabyldaý qajet. Mundaı máseleler Tuzdybastaý jáne basqa da eldi mekenderde de bar. Aýdannyń týrızmdi damytýǵa múmkindigi mol. Osyndaı árbir salada naqty josparlarmen jumys isteý qajet. Aýdan, qala ákimderi aldaryna naqty mindet qoıyp, maqsatty baǵytta jumys isteýi kerek. İstiń sońǵy nátıjesi halyqtyń turmysyn jaqsartýdan kórinedi. Basty talap ta osy», - dedi sóziniń qorytyndysynda oblys ákimi Amandyq Batalov.