Memleket basshysynyń tapsyrmasy boıynsha jańa Sý kodeksiniń jobasyna tasqyn jáne erigen qar sýynyń aldyn alý jáne qorǵaý is-sharalary engizildi.
Sý resýrstary jáne ırrıgasıa mınıstrligi, Parlament Májilisiniń depýtattary men sarapshylar qujatty pysyqtaýdy jalǵastyrýda, dep habarlaıdy aqshamnews.kz sala mınıstrligine silteme jasap.
Sý kodeksiniń jobasyna sáıkes, eldi mekender men nysandardy qorǵaý úshin jergilikti atqarýshy organdar bógetter, mobıldi qorshaýlar, aınalma arnalar men ýaqytsha sý qoımalaryn salý jumystaryn júrgizýi kerek. Sondaı-aq, jergilikti atqarýshy organdar sý tasqyny men erigen sýdan qorǵaý úshin orman ekpelerin otyrǵyzýdy júzege asyrýy tıis.
Óz kezeginde, baseındik josparlar elimizdegi 8 sý sharýashylyǵy baseıniniń árqaısysyna qajetti is-sharalardy anyqtaıdy.
Sondaı-aq, jańa Sý kodeksiniń jobasy qurǵaqshylyqqa qarsy is-sharalardy, sonyń ishinde jaýyn-shashyn men topyraq ylǵaldylyǵynyń deńgeıin baqylaýdy, qurǵaqshylyq kezeńi úshin tasqyn sýdy jınaý men saqtaý, sý únemdeıtin tehnologıalardy engizýdi jáne qurǵaqshylyqqa tózimdi daqyldardy paıdalaný arqyly aýyl sharýashylyǵyn beıimdeýdi kózdeıdi.
«Qujat memlekettik organdardyń sý tasqyny men qurǵaqshylyqqa qarsy is-qımyl máselesindegi ókilettikterin naqty aıqyndaıdy. Engizilgen túzetýler sý sektorynyń klımattyń ózgerýine beıimdelýine, sýdyń zıandy áseriniń qaýpin azaıtýǵa jáne gıdrotehnıkalyq qurylystardyń qaýipsizdigin arttyrýǵa jaǵdaı jasaıdy», - dedi Sý resýrstary jáne ırrıgasıa mınıstrliginiń Sý saıasaty departamentiniń dırektory Serikjan Beketaev.