Almatyda jańa jyl keshterine tyıym salynbaıtyn boldy
Bul jóninde qalanyń bas sanıtarlyq dárigeriniń orynbasary Sádýaqas Baıǵabylov málimdedi. Iaǵnı «Ashyq» qosymshasy ornatylǵan kez-kelgen meıramhana nemese qoǵamdyq tamaqtaný oryndaryna «statýsy jasyl» qonaqtar ǵana kire alady, dep habarlaıdy Almaty-akshamy.kz 24.kz-ke silteme jasap.
Al neshe adam kire alatyny dál sol kezdegi epıdahýalǵa baılanysty bolady. Eger sol ýaqytta qala «jasyl aımaqta» bolsa zal 50%-ke deıin ǵana tolýy kerek ári kelýshilerdiń sany 100 adamnan aspaýy shart. Al «sary» nemese «qyzyl aımaqqa» ótip jatsa adam sany azaıtylýy tıis.
«Kez kelgen ujym jańajyldyq merekeni toılatqysy kelse, karantındik talaptardy qatań saqtaýy kerek. Birinshi kezekte qala turǵyndary vaksına alý kerek. Jáne betperde taǵyp, araqashyqtyqty saqtap júrýi tıis. Sondaı-aq barlyq meıramhanalardan, qoǵamdyq tamaqtaný oryndarynan «Ashyq» qosyshasynan bólek sanıtarlyq tazalyq talap etiledi. Eger qalada Covid juqtyrý kórsetkishi ýshyǵyp bara jatsa, jańajyldyq jáne basqa da merekelerdiń ótýine tyıym salynady», - deıdi qalalyq bas sanıtar dárigerdiń orynbasary Sádýaqas Baıǵabylov.