Prezıdenttik jastar kadr rezervi – elimizdiń órkendeýine eleýli úles qosam degen jastarǵa baǵyttalǵan biregeı joba. Joba aıasynda kásibı daıarlyǵy joǵary, tájirıbeli jastarǵa joǵary ákimshilik jáne saıası laýazymdarǵa ornalasý úshin erekshe múmkindik beriledi. Máselen, tıisti laýazymdarda bos oryndar paıda bolǵan jaǵdaıda Prezıdenttik jastar kadr rezervinde turǵan azamattardyń kandıdatýralaryna basymdyq beriledi.
Aqshamnews.kz tilshisi Prezıdenttik jastar kadr rezervine qatysty sońǵy aqparatty bilý maqsatynda Memlekettik qyzmet isteri agenttigine resmı saýal joldaǵan edi. Redaksıa hatyna resmı jaýapta bıylǵy irikteý barysy, rezervtiń jumys prınsıpteri jáne joba arqyly usynylatyn múmkindikter týraly keńinen málimet berildi.
Osydan bir aı turyn Prezıdenttik jastar kadr rezerviniń qatary jańa úmitkerlermen tolyqty. Bıylǵy maýsym aıynda bastalǵan irikteýge qatysýǵa onlaın-platforma arqyly 97 myńnan astam adam qyzyǵýshylyq tanytqan.
Agenttiktiń túsindirýinshe, rezervke qabyldanǵan tulǵalar mindetti túrde laýazymǵa taǵaıyndalady degen talap joq. Rezervke engen azamattar QR Prezıdentiniń janyndaǵy Memlekettik basqarý akademıasy men onyń fılıaldarynda kásibı jáne tulǵalyq damýǵa arnalǵan oqytý kýrstary men trenıńterge qatysý múmkindigine ıe bolady. Bul olar úshin bolashaqta joǵary deńgeıli basqarýshylyq qyzmetterge daıyndyqtyń mańyzdy bóligi bolyp sanalady.
Prezıdenttik jastar kadr rezervi – memlekettik qyzmet júıesinde kásibı ósýge teń múmkindikter beretin, talantty ári perspektıvaly jastardy anyqtaýdy maqsat etetin strategıalyq joba. Memleket basshysynyń tapsyrmasymen 2019 jyly iske qosylǵan bastama búginge deıin elimizdiń kadrlyq áleýetin nyǵaıtýǵa eleýli úles qosyp keledi.
Bıylǵymen qosqanda barlyǵy tórt kezeń boıynsha júrgizilgen irikteý qorytyndysynda rezervke barlyǵy 450 jas maman qabyldandy:
- 2019 jyly - 300 adam,
- 2021, 2023 jáne 2025 jyldary - 50 adamnan.
Sýret: web.telegram.org/k/#@prokadrykz
Qazirgi tańda alǵashqy úsh kezeńniń 400 rezervshisiniń 321-i (80,7%) memlekettik organdar men túrli uıymdarda qyzmet atqarýda. Olardyń ishinde:
- 38 rezervshi - saıası laýazymdarǵa,
- 5 adam - "A" korpýsynyń laýazymdaryna,
- 3 adam - Májilis depýtaty,
- 1 adam - máslıhat depýtaty bolyp taǵaıyndalǵan.
Olardyń arasynda birqatary osy kúni laýazymdy qyzmetterdi atqaryp júr:
Ryspekov D. A. - Ulytaý oblysynyń ákimi;
Nurpeıisov A.B. - QR Prezıdentiniń İs basqarýshysy;
Spotkaı M.A. - Senat Apparatynyń jetekshisi;
Baıel A.D. - Ázirbaıjandaǵy Tótenshe jáne Ókiletti elshi;
Adambekov T.S., Baıtilesov N.T., Mútáli Á. - Parlament májilisiniń depýtattary.
Genderlik quram da nazarda: rezervtegi 450 adamnyń 15%-y - áıelder (69 adam), 85%-y - erler (381 adam).
Prezıdenttik jastar kadr rezervine irikteýden ótý kezeńderi qandaı?
Qazaqstan Respýblıkasy Prezıdentiniń 2019 jylǵy 27 tamyzdaǵy №141 Jarlyǵymen bekitilgen qaǵıdalarǵa sáıkes, irikteý birneshe kezeńnen turady:
1. Qujattardy qabyldaý
Úmitkerler ótinimderin "www.pkrezerv.gov.kz" platformasy arqyly tapsyrady. Qatysý talaptary:
- 35 jasqa deıin;
- joǵary bilim;
- qazaq tilin V1 deńgeıinen tómen emes meńgerý;
- keminde 5 jyl eńbek ótili;
- QR azamaty bolýy.
2. Mátindik jáne sandyq aqparatpen jumys isteý qabiletin baǵalaý
Kandıdattar mátindik jáne sandyq aqparatty taldaý testilerinen ótedi.
3. Sıtýasıalyq tapsyrmalardy sheshý
Memlekettik qyzmetke tán naqty jaǵdaılardy modeldeý arqyly basqarýshylyq sheshim qabyldaý qabileti tekseriledi.
4. Quzyretterdi baǵalaý
Eki bloktan turady:
"Assessment-ortalyq" - minez-qulyq ındıkatorlary arqyly kásibı quzyretterdi anyqtaý;
5. Sarapshylyq komısıada áńgimelesý
Kandıdat óz salasyn damytýǵa qatysty kózqarasyn usynady.
6. Ulttyq komısıada qaraý
Sarapshylyq komısıa usynǵan kandıdattardyń fınaldyq sheshimi qabyldanady.
Rezervke engender úshin jandaı múmkindikter bar?
Qaǵıdalarǵa sáıkes, rezervke qabyldanǵan kúnnen bastap úsh jyl ishinde:
- saıası laýazymdarǵa,
- "A" korpýsynyń,
- "B" korpýsynyń basshylyq qyzmetterine taǵaıyndalý múmkindigi beriledi.
Sonymen qatar, rezervshiler zamanaýı oqytý baǵdarlamalaryna, basqarýshylyq quzyretterdi damytýǵa arnalǵan trenıńterge qatysa alady.
Olarǵa qoıylatyn negizgi talaptar:
-
strategıalyq oılaý;
-
bastamashyldyq;
-
jaýapkershilik;
-
tıimdi sheshim qabyldaý;
-
adaldyq, ashyqtyq, ádildik jáne memlekettik qyzmet etıkasyn saqtaý.
İrikteý barlyq óńirler úshin birdeı talaptarmen júrgiziledi. Arnaıy óńirlik kvota qarastyrylmaǵanymen, úmitkerlerdiń aımaqtyq alýan túrliligin qamtamasyz etýge erekshe mán beriledi. Ashyq ári ádil báseke nátıjesinde eldiń barlyq aımaǵynan jastar rezervke enip keledi.
Prezıdenttik jastar kadr rezervi elimizdiń basqarý júıesi úshin jańa býyn kóshbasshylaryn qalyptastyrýdyń tıimdi mehanızmine aınaldy. Rezervshilerdiń reformalardy iske asyrýǵa belsendi aralasýy, olardyń jaýapty qyzmetterge taǵaıyndalýy jobanyń ózektiligi men nátıjeliligin kórsetedi.
Bul bastama:
- memlekettik qyzmettiń tartymdylyǵyn arttyrady;
- jas mamandardyń áleýetin ashady;
- ulttyq kadrlyq saıasatty jańǵyrtady;
- elimizdiń damýyna úles qosatyn jańa kóshbasshylar býynyn qalyptastyrady.
Qazir 2025 jylǵy irikteýdiń qorytyndylary boıynsha jumys júrgizilip jatyr. Nátıjelerge súıenip, rezerv ınstıtýtyn odan ári jetildirý boıynsha tıisti sharalar qabyldanady.