Almaty ákimi Darhan Satybaldy Qytaı Halyq Respýblıkasyna jumys sapary aıasynda Qytaıdyń eń iri kópsalaly kompanıalarynyń biri 1988 jyly Shanhaıda qurylǵan «Yuexing Group» korporasıasynyń óndiristik jáne iskerlik keshenimen tanysty.
Qytaıdyń ozyq jekemenshik kompanıalarynyń qataryna kiretin «Yuexing Group» ulttyq naryqtaǵy eń iri qatysýshylardyń biri. 35 jyldan astam ýaqyt ishinde kompanıa jıhaz óndirisi, bólshek saýda, development, qonaq úı bıznesi jáne basqa da baǵyttardy biriktiretin ártaraptandyrylǵan bıznes qurylymyn qalyptastyrǵan.
Kezdesý barysynda Darhan Satybaldy eki tarap arasyndaǵy ózara is-qımyldyń zor áleýeti bar ekenin atap, korporasıanyń Almatyda aýqymdy jobalardy júzege asyrý múmkindigin joǵary baǵalady.
«Almatyda biz óndiristi ornalastyrýǵa qajetti barlyq ınfraqurylymy bar Indýstrıalyq aımaq bar. Bizdiń shahar sizderdiń kompanıalaryńyz úshin Eýrazıalyq ekonomıkalyq odaq naryǵyna shyǵa alatyn qaqpa bola alady», — dedi Almaty ákimi.
Kelissóz qorytyndysy boıynsha Almaty qalasy ákimdigi men «Yuexing Group» korporasıasy qurylys salasyndaǵy yntymaqtastyq jónindegi aldyn ala kelisimge qol qoıdy.