8 qarasha - elimizde Ulttyq statısıka kúni. Bul kún qoǵamnyń tynysyn sandarmen sıpattaıtyn mamandardyń kásibı merekesi.
Statısıka - bul jaı ǵana esep emes. Ol eldiń ekonomıkasyn, turmys deńgeıin jáne kúndelikti ómir saltyn kórsetetin aına ispetti. Aqshamnews.kz osy ataýly kúnge oraı, resmı statısıkadan tys qazaqstandyqtardyń ómir saltyn sıpattaıtyn birneshe qyzyqty faktilerdi usynady. Elimizde kóp másele dastarhan basynda aıtylyp, sol jerde bas qosady. Sondyqtan halqymyzdyń súıikti dámi men sýsyny jaıly jón kórdik.
Qazaqtyń súıikti sýsyny - shaı
Bigpicture.ru derekterine súıensek, Qazaqstan álemdegi eń kóp shaı ishetin on eldiń qataryna kiredi.
Bizdiń elimiz bul tizimde 10-orynda tur: árbir qazaqstandyq jylyna orta eseppen 1,54 kg shaı tutynady.
El turǵyndarynyń 99%-y kún saıyn shaı ishedi, al olardyń jartysy kúnine tórt nemese odan da kóp kese ishetinin moıyndaıdy.
Zertteýshi M.Ia. Kıttary XIX ǵasyrda-aq qazaqtardyń shaıdy "ýaqyt pen orynǵa qaramaı ishetinin" jazǵan. Rasynda, shaı – qazaq qonaqjaılyǵynyń sımvoly.
Et - qazaq dastarhanynyń basty taǵamy
QR Ulttyq statısıka búrosynyń dereginshe, 2024 jyldyń úshinshi toqsanynda elde jan basyna shaqqanda 20,5 kg et pen et ónimderi tutynylǵan.
Etti eń kóp tutynatyn aımaq - Jambyl oblysy (23,6 kg), eń tómen kórsetkish - Shymkent (15 kg).
Worldpopulationreview málimetine sáıkes, Qazaqstan TMD men Ortalyq Azıa elderi arasynda jan basyna shaqqandaǵy et tutyný boıynsha úshinshi orynda:
Belarýs - 94,5 kg
Reseı - 81,7 kg
Qazaqstan - 70,2 kg
Statısıka - el ómiriniń aınasy
Qazaqstanda resmı esep júrgizý isi bir ǵasyrǵa jýyq tarıhqa ıe.
HH ǵasyrdyń basynda qaǵaz saýalnamalar men arıfmometrler qoldanylsa, búginde derekter naqty ýaqyt rejıminde jınalyp, jasandy ıntellekt arqyly óńdeledi.
Búgingi tańda:
memlekettik organdarmen 19 ıntegrasıa iske asqan;
36 ákimshilik derekkózi qoldanylady;
94% respondent esepti onlaın túrde tapsyrady.
Internet-dúkender men fıskaldyq chekterden alynatyn parsıng júıesi baǵanyń ózgerisin naqty ýaqytta baqylaýǵa múmkindik beredi. Al derekterdi taldaýǵa jasandy ıntellekt kómektesedi.
Sandar men paıyzdardyń artynda – halyqtyń ómir salty, talǵamy jáne dástúri tur.
Shaı men et jaıly statısıka – bul tek turmys kórsetkishi emes, qazaq mádenıetiniń sıfrlyq kórinisi.
Sondyqtan Ulttyq statısıka kúni – tek esep júrgizýshilerdiń merekesi emes, sonymen birge eldiń shynaıy beınesin kórsetetin kún.