2023 jyldyń basynan bastap 2021-2025 jyldarǵa arnalǵan kásipkerlikti damytý jónindegi ulttyq joba sheńberinde halyqtyń áleýmettik osal toptaryna jatatyn azamattarǵa jańa bıznes-ıdeıalardy iske asyrý úshin 9 102 grant, onyń ishinde aýyl turǵyndaryna 6 011 grant berildi.
2023 jyly jalpy 9000 grant berý josparlanǵan bolatyn, dep habarlaıdy Almaty-akshamy.kz.
2023 jyly mal sharýashylyǵyna – 2 907, ósimdik sharýashylyǵyna – 148, múkámmal, eńbek quraldaryn satyp alýǵa – 2 221, tehnologıalyq jabdyqtardy satyp alýǵa – 3 661, oryn jaıdy jalǵa alýǵa – 165 qaıtarymsyz granttar berildi.
Alýshylardyń sanattary bólinisinde kópbalaly otbasylardyń múshelerine – 4 963, múgedektigi bar adamdarǵa – 1 827, múgedektigi bar balalardy tárbıelep otyrǵan ata-analarǵa – 1 118, ataýly áleýmettik kómek alýshylarǵa – 562, asyraýshysynan aıyrylý boıynsha tólem alýshylarǵa – 421, qonys aýdarýshylarǵa – 181 jáne qandastarǵa – 30 grant berildi.
Bıyl granttar alýǵa ótinishterdi qabyldaý 3 lek boıynsha ótkizildi. Úmitkerlerden barlyǵy 66 myńnan astam ótinish, onyń ishinde kópbalaly otbasylardan – 39,9 myń, múgedektigi bar adamdardan – 11,7 myń, múgedektigi bar balaǵa kútim jasaıtyn adamdardan – 8 myń, ataýly áleýmettik kómek alýshylardan – 3,5 myń ótinish qabyldandy. Sondaı-aq, asyraýshysynan aıyrylǵan adamdar qatarynan 2,6 myń adam, 702 qonys aýdarýshy jáne 217 qandas ótinish berdi.
Ótinimderdiń eń kóp sany Túrkistan oblysynyń (14,9 myń), Shymkent qalasynyń (7,8 myń), Jambyl (7,6 myń), Qyzylorda (7,5 myń) oblystarynyń jáne eń az sany Ulytaý (136) jáne Qostanaı (159) oblystarynyń úmitkerlerinen kelip tústi.
Esterińizge sala keteıik, granttardy eńbek mobıldiligi ortalyqtary úmitkerlerdiń ótinishterin qaraý jónindegi aýdandyq/qalalyq komısıanyń sheshimi negizinde beredi.
Úmitkerler ózderiniń bıznes-jobalaryn komısıa otyrystarynda tanystyrady. Komısıa otyrysynyń ótkiziletin orny, kúni men ýaqyty týraly habarlama Business.enbek.kz portalynda grant alýǵa ótinish berýshiniń jeke kabınetinde kórsetiledi.
Bul rette, komısıanyń árbir múshesi bıznes-jospardy baǵalaıdy jáne baǵalaý paraǵyn mynadaı krıterııler boıynsha toltyrady: bıznes-ıdeıanyń básekege qabilettiligi, ótkizý naryqtarynyń pysyqtalýy, bıznes-jobanyń qarjylyq ómirsheńdigi, kásipkerlik daǵdylardyń deńgeıi, jańa jumys oryndaryn qurý.
Osylaısha, grant berý týraly sheshim komısıalyq jáne úmitkerlerdiń bıznes-jobalarynyń pysyqtalýyn baǵalaýdyń naqty krıterııleri negizinde qabyldanady.
Komısıanyń sheshimi týraly aqparat úmitkerdiń Business.enbek.kz portalyndaǵy jeke kabınetine jiberiledi. Komısıa oń sheshim qabyldaǵan jaǵdaıda úmitker salyq organdarynda óz qyzmetin tirkeıdi, banktik derektemelerdi usynady, shartqa qol qoıady jáne odan ári toqsan saıyn bólingen qarajattyń paıdalanylýy týraly esepterdi usynady. Munyń bári eńbek mobıldiligi ortalyqtaryna barmaı-aq, elektrondyq formatta jasalady.
Kelesi jyly da halyqtyń áleýmettik osal toptaryna 9 myń grant berý kózdelgen.