Almaty qalasynyń Óńirlik komýnıkasıalar qyzmetinde ótken baspasóz konferensıasynda Almaty jastaryn qoldaýǵa baǵyttalǵan aýqymdy jobalar týraly aqparat aıtyldy.
Qalada jalpy 14 pen 35 jas aralyǵyndaǵy 695,6 myńnan asatyn jastar turady. İske asyrylyp jatqan jobalar týraly tolyǵyraq Jastar saıasaty basqarmasynyń basshysy Azız Kajdenbek toqtaldy, dep habarlaıdy aqshamnews.kz.
Spıkerdiń aıtýynsha, qala ákimdigi tórt negizgi baǵytta belsendi jumys isteýde, onyń ishinde bilim berý jáne jumyspen qamtý, jastarǵa arnalǵan ınfraqurylymdy damytý, mádenı jáne sporttyq is-sharalarǵa tartý, sondaı-aq jańa jataqhanalarmen qamtamasyz etý.
2025 jyly negizgi basymdyq tabysty jobalardy keńeıtý jáne jańa bastamalardy iske qosýǵa beriledi. Jastar saıasaty basqarmasy qazirdiń ózinde «ALMA CUP» sporttyq týrnıri, «Jas Gala – 2025» shyǵarmashylyq festıvali jáne «IQ-ALA jastary» ıntellektýaldyq jobasy sıaqty mańyzdy baǵdarlamalardy júzege asyrýda. Sonymen qatar «Antıkorrýpsıalyq volonterlik» jáne «Sanaly ata-ana mektebi» sıaqty jastardyń áleýmettik múmkindikterin keńeıtýge baǵyttalǵan jańa jobalar qolǵa alynbaq.
«Bıyl júzege asyrylatyn jobalar sany 56-ǵa deıin ulǵaıady, bul ótken jylmen salystyrǵanda 10 jobaǵa artyq. Mańyzdy baǵyttardyń biri – jumysshy mamandyqtardy jáne otandyq ónerdi nasıhattaý, onyń ishinde qysqametrajdy fılmder túsirý jáne «Ashyq aspan astyndaǵy kıno» jobasyn iske asyrý», – dep atap ótti A. Kajdenbek.
Sonymen qatar, 2025 jyly 5 jańa komúnıtı-ortalyq ashý josparlanyp otyr, olar bilim berý jáne mádenı bastamalar alańyna aınalady. Al 6 myń oryndyq jańa stýdenttik jataqhanalar stýdentterdiń baspana tapshylyǵyn aıtarlyqtaı azaıtýǵa múmkindik beredi.
Almatyda 2025 jyly jastar bastamalaryn damytý jáne salaýatty ómir saltyn nasıhattaý maqsatynda 1 myńnan astam mádenı jáne sporttyq is-sharalar ótkizý josparlanýda. Sondaı-aq qala jasandy ıntellekt salasyn damytýǵa erekshe nazar aýdaryp, komúnıtı-ortalyqtar bazasynda bilim berý baǵdarlamalaryn iske qosýdy kózdeıdi.
«NarkoStop» volonterlik jobasy men «Árkim mańyzdy» ınklúzıvti damý baǵdarlamasy da óz jalǵasyn tabady. Bul joba ınklúzıvti jáne áleýmettik baǵdarlanǵan qoǵamdy qurýǵa baǵyttalǵan, onda árbir adam óziniń múmkindikterine qaramastan óz áleýetin iske asyryp, ortaq ıgilikke úles qosa alady. Negizgi mindetter – ómir súrý jaǵdaıyn jaqsartý, jastardy áleýmettik-mádenı bastamalarǵa tartý, mamandardy ınklúzıvti ádistermen jumys isteýge úıretý.
«Memleket basshysy Qazaqstan halqyna Joldaýynda kásiptik bilim reformasynyń mańyzdylyǵyn atap ótip, 2025 jyldy – Jumysshy mamandyqtar jyly dep jarıalady. Osyǵan oraı, biz jastardy tehnıkalyq jáne ınjenerlik mamandyqtarǵa tartýǵa baǵyttalǵan áleýmettik qysqametrajdy fılmder ázirledik, olar ulttyq kásiptik baǵdarlaý baǵdarlamasynyń bir bóligine aınalady», – dedi A. Kajdenbek.
Sóz sońynda spıker aýqymdy bastamalar jastarǵa óz áleýetin júzege asyrýǵa jáne el men qalanyń damýyna úles qosýǵa múmkindik beretinin atap ótti.