Qazaqstandyq delegasıanyń Aýǵanstanǵa saparyndaǵy negizgi máselelerdiń biri – birlesken kólik múmkindikterin keńeıtý. Qazaqstan jáne Aýǵanstan premer-mınıstrleriniń orynbasarlary Serik Jumanǵarın men Abdýlanıı Baradardyń 24 sáýirde ótken kezdesýinde taraptar Ortalyq jáne Ońtústik Azıany ıntegrasıalaý jobalaryndaǵy yntymaqtastyqty damytýǵa ózara múddelilik tanytty.
Atap aıtqanda, qazaqstandyq taraptyń transaýǵandyq dálizdi damytý jobalaryn: Termez – Mazarı-SHarıf – Kabýl – Peshavar jáne Gerat – Kandagar – Spın-Býldak temir joldaryn salý jónindegi jobalardy iske asyrýǵa qatysýǵa daıyndyǵy belgilendi. Joba Ortalyq jáne Ońtústik Azıa elderi arasynda júkterdi jetkizý ýaqytyn 10 esege qysqartýǵa, sondaı-aq júkterdi tasymaldaý qunyn tómendetýge múmkindik beredi. Qazaqstan temir joldyń joǵarǵy qurylysyna arnalǵan materıaldardy, óz óndirisiniń shpaldary men bekitkishterin jetkizý arqyly transaýǵan magıstraliniń qurylysyna qatysýǵa daıyn.
Sońǵy úsh jylda Qazaqstannan Aýǵanstanǵa eksporttyq tasymaldaý kólemi turaqty túrde ósip keledi: 2023 jyly temir jol arqyly tasymaldaý kólemi 2,7 mln tonnany qurady, onyń 1,5 mln tonnasy – un jáne astyq. Bul 2021 jylǵy deńgeımen salystyrǵanda 14%-ǵa kóp. Aldaǵy jyldarǵa arnalǵan boljam – eksporttyń 40%-ǵa ulǵaıýy. Bul rette 2030 jylǵa qaraı tasymaldardyń 3 ese ósýi kútilýde.
Taraptar sondaı-aq elder arasyndaǵy áýe qatynasyn qalpyna keltirý múmkindikterin talqylady. Qazaqstan men Aýǵanstannyń avıasıalyq bıligi arasyndaǵy ózara túsinistik týraly memorandým sheńberinde Taraptardyń avıatasymaldaýshylary aptasyna 3 turaqty jolaýshylar júk reısterin oryndaýǵa quqyly. Qazaqstandyq tarap bul máseleni Aýǵan avıakompanıalarynan ótinimder túsken kezde qaraýǵa daıyn.
Ótken kezdesýde «QTJ» UK» AQ ókilderi eksporttyq jáne tranzıttik jobalardy tanystyrdy.
«Búginde Qazaqstannan Ózbekstan, Aýǵanstan, Pákistan arqyly jáne odan ári teńiz arqyly BAÁ-degi Djebel-Alı portyna deıin jańa mýltımodaldy eksporttyq baǵyttardy uıymdastyrý boıynsha pılottyq joba bastaldy. Jańa baǵyt KTZ Express-tiń qatysýymen uıymdastyryldy. Eksporttaýshy – qazaqstandyq Bio Synergy co, júkterdi jetkizý boıynsha seriktes – pákistandyq National Logistics Cell (NLC). Qazirgi ýaqytta Pavlodar oblysynda júk tıeý bastaldy. Bul – alúmını sılıkatty qýys mıkrosfera. Almatyda júk konteınerlerge tıelip, pákistandyq seriktes mashınalaryna aýystyrylady. Ári qaraı avtokólikpen Ózbekstan men Aýǵanstan arqyly Pákistannyń Karachı portyna deıin jetkiziledi. Ol jerden eki konteıner teńiz arqyly BAÁ-degi Djebel-Alı portyna deıin jóneltiledi», — dedi «QTJ» UK» AQ basqarýshy dırektory Baýyrjan Orynbasarov.
Onyń aıtýynsha, júkterdi mejeli jerge jetkizýdiń kútiletin merzimi-shamamen 20-25 kún. Pılottyq jobany sátti iske asyrý kezinde osy baǵyttyń belsendi damýy jáne jańa baǵyt boıynsha júk aǵynynyń edáýir kólemin tartý kútiledi.
Sol kúni Serik Jumanǵarınniń Aýǵanstannyń Syrtqy ister mınıstri Amır Mýttakımen jáne saýda jáne ónerkásip mınıstri Nurıddın Azızımen kezdesýleri ótti.