Qazaqstan Jazýshylar kitaphanasynda jazýshy-pýblısıst, «Mecenat.kz» ádebı syılyǵynyń tuńǵysh laýreaty Sharhan Qazyǵuldyń «Kúlpet» atty kitabynyń tusaýkeser rásimi ótti. Atalmysh kitap «ARNA-B» baspasynyń qoldaýymen jaryq kórgen.
İs-sharada jazýshy-jýrnalıst, QR Prezıdenti syılyǵynyń jáne Qazaqstan Jýrnalıser Odaǵy syılyǵynyń laýreaty Qalı Sársenbaı, «Alatay Aqparat» medıaholdınginiń bas dırektory Erjan Qalymbaıuly, Qazaqstan Jazýshylar Odaǵynyń múshesi Dáýletbek Baıtursynuly roman jaıly óz pikirlerimen bólisip, kitaptyń tusaýkeser rásimin jasady.
«Kúlpet» romany Qazaqstannyń sosıalızm dáýirindegi kezeńinen bastap qazirgi kúnge deıingi tarıhyn basty keıipker Ábýjan Raıysovtyń ómiri men taǵdyry arqyly sýretteıdi. Roman týǵan jerge degen mahabbat pen shynaıy patrıotızm, qazaq áıeliniń adaldyǵy, ulttyq dástúrdi saqtaý sıaqty qundylyqtar arqyly búkilálemdik suraqtarǵa jaýap izdeıdi.
«Romanda jańasha stılge, qazirgi zamanǵy taqyrypty meńgerýge, til revolúsıasy men evolúsıasyna erekshe mán berdim. Ózim sonshalyqty bir passeıst bolmasam da qazaqtyń kónerip bara jatqan sóz tirkesterin keńinen paıdalanýǵa kóp kóńil bóldim. Biraq bul jaǵynan da óte saq bolǵanymdy jasyrmaımyn.
Romandy jazyp jatqanda onyń ataýyn tabýǵa asyǵa qoımadym, jumystyń orta tusynda 5 tomdyq qazaq tiliniń túsindirme sózdigin bir tomyn ashyp qarasam, «Kúlpet» degen sóz bar eken. Bul – arhaızm. Jan azaby degen maǵynany bildiredi. Meniń shyǵarmama taptyrmaıtyn ataý ekenin uqtym»,– dedi jazýshy Sharhan Qazyǵul.
Shyǵarmashylyq kezdesýde «Alataý» dástúrli óner teatrynyń ártisteri halyq ánderin shyrqady. Ál-Farabı atyndaǵy QazUÝ koleji, D.A.Qonaev atyndaǵy zań kolejiniń ctýdentteri, oqyrmandar men kitaphana qyzmetkerleri oıtalqyǵa qatysty.
«Sharhannyń «OŃASHADAǴY «ONLAIN» OILAR» shyǵarmasy «Almaty aqshamy» gazetinde jarıalanyp otyrdy. Sonda oqyrmandarymyz túrli oı pikirlerin aıtyp qyzǵýshylyq tanytqan edi.
Romanda salt-dástúr tartymdy baıandalady. Mesenattar jarıalaǵan romandar báıgesinde qara úzip shyqqan týyndy. Toptan sýyrylyp ozdy da, ári qaraı qulagerdeı dara shapty. Sharhan «Kúlpet» romanynda «jan máńgiligine» ılandyra alǵan. Kórkem shyǵarmanyń negizgi maqsaty da osyndaı tárbıe bolsa, avtor dittegenine jetken. Qazaq ádebıetine qosylǵan súbeli úles. Ózindik stılmen, jańasha jazylǵan dúnıe», – dedi Qalı Sársenbaı.
Roman ishinde búgingi jahandaný dáýirinde qazaq ultynyń ıdentıfıkasıasyn, álemde óziniń laıyqty ornyn saqtap qalýdy maqsat etken. Sondaı-aq, aqyldy, bilimdi azamattardyń týǵan jerden jyraqqa ketpeı, eńbek etýine jaǵdaı jasaý, jastardyń patrıottyq sezimin oıatý týraly oılary aıtylǵan. Atalmysh roman kóp adamnyń qolqa salýymen dúnıege kelgen.