Almatylyqtar Aıtmatovtyń ataqty «Jamııla» shyǵarmasy boıynsha qoıylǵan múzıkldiń premerasyn tamashalady, dep habarlaıdy Aqshamnews.kz tilshisi.
Shahardyń bas saraıynda ótken mýzykalyq spektákldi almatylyqtarǵa tartý etken Qyrǵyzstannyń Toqtyqul Satylǵanov atyndaǵy Ulttyq fılarmonıasy. Alǵashqy premera byltyr kóktemde Qyrǵyzstanda ótken, bıylǵy gastról Almaty sahnasynan bastaldy. Spektákl budan ári Baký, Tashkent, Ankara jáne Eýropanyń birneshe qalasynda kórsetiledi.
Qoıylym bastalar aldynda keshtiń shymyldyǵyn ashqan QR Memlekettik keńesshisi Erlan Qarın qazaq pen qyrǵyz arasyndaǵy mádenı baılanystarǵa toqtaldy:
«Búgin Respýblıka saraıynda erekshe kesh. Bul shara bizdiń basymyzdy biriktiredi. Qazaq pen qyrǵyz – tóskeıde maly, tósekte basy qosylǵan baýyrlas halyq. Eki halyqty mádenıet, dástúr, óner men tarıhtaǵy tanymal tulǵalar sıaqty biriktiretin ortaq dúnıemiz kóp. Kúni keshe Osh qalasynda Abaıǵa arnalǵan mýzeı ashyldy, al búgin Almatyda «Jamııla» múzıkli sahnalanady, – dedi Erlan Tynymbaıuly.
Qyrǵyz eliniń atynan sóz alǵan memlekettik hatshy Marat Imanqulov bul premeranyń dostyqtyń sımvoly ekenin atap ótti:
«Shyńǵys Aıtmatovtyń esimi qyrǵyz ben qazaq mádenıeti úshin ortaq. Al jazýshynyń shyǵarmashylyǵyn alǵash qoldaǵan – qazaq ádebıetiniń dúldili Muhtar Áýezov. Sondyqtan bul múzıkldiń Almaty sahnasynda ótýiniń erekshe máni bar, – dedi Marat Imanqulov.
«Jamııla» – Jámıla esimdi kúıeýi soǵysqa ketken jas kelinshek pen maıdannan jaraly bolyp oralǵan Danıardyń arasynda mahabbat tarıhyn Jámılanyń qaınysy Seıttiń aýzymen baıandaıtyn shyǵarma.
Sýretshi bolýdy armandaǵan jas balanyń jeńgesi men Danıardyń sýretin salamyn degen armany, jas jubaılardyń arasyna soǵys salǵan syzat, júrekpen sezilgen názik mahabbat – choń Shyńǵystyń qýatty qalamynan týǵan shyǵarmanyń negizgi arqaýy, osynyń bárin qyrǵyz ártisteri múzıkl arqyly kórermenge jetkize bildi. Aıtmatovtyń talaı rejıserdi shabyttandyrǵan bul shyǵarmasyndaǵy adamgershilik birlik, ózara kómek pen rýhanı tózimdilik taqyryby spektáklde erekshe kórinis tapty.
Danıar rólin Quralbek Chokoev, Jámıla rólin Syrǵa Saǵynbekova somdady. Horeografıany bas baletmeıster Erlan Qamytbekov qoıǵan, qoıylymnyń mýzykasyn jazǵan kompozıtor Myrzalı Jıenbaev. Múzıkldiń bas úılestirýshi-jetekshisi Qyrǵyzstannyń Halyq ártisi Qyrǵyzbaı Osmonov, qoıýshy – Qyrǵyzstannyń Eńbek sińirgen ártisi Bolot Tentımyshev.
Shyńǵys Aıtmatovtyń júz jyldyq mereıtoıyna arnalǵan halyqaralyq joba kórermenge rýhanı ári estetıkalyq lázzat syılap, qazaq-qyrǵyzdyń mádenı baılanysyn jańa deńgeıge kóterdi.