Ál-Farabı atyndaǵy QazUÝ-da jýrnalısıka fakúltetiniń uıymdastyrýymen «Medıaındýstrıa jáne bilim berýdegi seriktestik: kadr daıarlaý máseleleri» taqyrybynda respýblıkalyq jumys berýshiler forýmy ótti, dep habarlaıdy aqshamnews.kz
Sharaǵa elimizdiń jetekshi medıa uıymdarynyń, baspa úıleriniń jáne PR-kompanıalardyń basshylary men sarapshylary qatysty.
Forýmda qazirgi medıanaryqtaǵy ózgerister, sıfrlyq transformasıa, jas mamandarǵa qoıylatyn jańa talaptar, sondaı-aq ýnıversıtet pen ındýstrıa arasyndaǵy seriktestikti nyǵaıtý joldary talqylandy.
Jýrnalısıka fakúltetiniń dekany Qanat Áýesbaı forýmdy ashyp, medıa salasynyń jyldam damýy jaǵdaıynda bilim berý baǵdarlamalaryn jańǵyrtý jáne eńbek naryǵynyń suranysyna beıimdeý qajettigin atap ótti. Ol medıa naryǵyndaǵy qarqyndy ózgerister jaǵdaıynda kadr daıarlaýdyń jańa standarttaryn qalyptastyrý men engizýde forýmnyń mańyzy zor ekenin atap ótti. Dekan sondaı-aq QazUÝ men sala seriktesteri arasyndaǵy yntymaqtastyq túlekterdiń básekege qabilettiligin arttyrýda sheshýshi ról atqaratynyn aıtty.
Beınematerıal kórsetilgennen keıin spıkerler medıa jáne bilim berý salalary arasyndaǵy dıalogqa kóshti. Forým spıkerleri sıfrlyq jýrnalısıka, medıa transformasıasy, jas mamandarǵa qoıylatyn talaptar, sondaı-aq ýnıversıtetter men ındýstrıa arasyndaǵy seriktestiktiń básekege qabiletti kadrlar daıarlaýdaǵy róli boıynsha ózekti pikirlerin ortaǵa saldy.
Forýmǵa bilikti medıamenedjer Nurjan Jalaýqyzy, «Alatau Aqparat» medıaholdınginiń bas dırektory Erjan Tólek, «IRIS PR CONSULTING» PR bóliminiń jetekshisi Yrys Amangeldi, «NAR MEDIA GROUP» kompanıasynyń dırektory Nartaı Ótegen, QR Ulttyq memlekettik kitap palatasy dırektorynyń orynbasary Tolqyn Turǵalıqyzy, Abai TV bas prodúseri Jańylhan Asylbekova, «Abaı.kz» aqparattyq portalynyń bas redaktory Nurgeldi Ábdiǵanı jáne basqa da jýrnalıser qatysty.
Qatysýshylar jumys berýshiler men ýnıversıtet arasyndaǵy baılanystardy nyǵaıtý, stýdentterdiń tájirıbeden ótý, taǵylymdama men alǵashqy jumys ornyn tabýyn jeńildetý tetikterin qarastyrdy. Jańa medıa-quzyretterge qoıylatyn talaptardy jańartý da negizgi taqyryptardyń biri boldy.
Forým aıasynda jumys berýshilermen memorandýmdarǵa qol qoıylyp, seriktester marapattaldy. Sonymen qatar stýdentterge jumys berýshilermen tikeleı kezdesýge múmkindik bergen «Mamandyqtar jármeńkesi» uıymdastyryldy.