“Eralash” kınojýrnalynyń rejıseri joǵalǵan ámıanyn taýyp bergen jambyldyq polıseılerge alǵys bildirdi, – dep habarlaıdy almaty-akshamy.kz Polisia.kz-ke silteme jasap.
Reseı Federasıasynyń azamatshasy Marına Súleımanova Jambyl oblysy PD patrúldik polısıa batalónynyń qyzmetkerlerine mańyzdy qujattary, aqshasy jáne páter kiltteri bar ámıanyn izdestirýdegi jedel áreketteri úshin óziniń shynaıy alǵysyn bildirdi.
Rejıser áıel ámıanyn taksı kóliginde qaldyryp ketken. Kedendik ótkizý beketine kelgen kezde ámıanyn joǵaltqanyn túsinip, dereý polısıa qyzmetkerine júgingen. Keshendi is-sharalar ótkizý jáne beınebaqylaý kameralaryn qaraý barysynda patrúldik polısıa ınspektory Madıar Asýbaev taksı avtokóligin anyqtady. Nátıjesinde az ýaqyt ishinde qundy zattary bar ámıany tabylyp, ıesine qaıtaryldy.
– Jarty saǵattyń ishinde polısıa qyzmetkeri joǵalǵan zatymdy taýyp, maǵan qaıtardy. Sol sátte men shet elde júrgendikten, qatty qobaljyp kettim, kimge júginý jáne ne isteý kerektigin bilmedim. Biraq patrúldik polısıa ınspektory meni tynyshtandyryp, ámıandy tabýǵa ýáde berdi. Jambyldyq polıseılerdiń kórsetken qoldaýy, kásibı ári shuǵyl qyzmeti úshin zor alǵysymdy bildiremin. Polısıa qyzmetkeriniń joǵary nátıjeleri men belsendi ustanymyna tánti boldym, olar meniń shaǵymym boıynsha birden áreketke kóshti, – dedi Marına Súleımanova.