«Ekoǵa» qatysýshylardyń jas shekteýine qatysty ózgerister ataldy
Nur-Sultan qalasyndaǵy №2 kópbeıindi qalalyq aýrýhanasy otbasyn josparlaý ortalyǵynyń gınekolog-endokrınology Aıgúl Musabaeva «ekoǵa» qatysýshylardyń jas shekteýine qatysty ózgeristerdi atady, dep habarlaıdy Almaty-akshamy.kz QazAqparat saıtyna silteme jasap.
«Ańsaǵan sábı» baǵdarlamasy boıynsha bala súıýge kimniń múmkindigi bar? Bul baǵdarlama boıynsha jasandy jolmen uryqtandyrý ádisin bala súıýge úmitti, reprodýktıvti jastaǵy kez kelgen jup paıdalana alady. Konservatıvti jolmen emdeý nátıje bermeıtin bedeýlik dıganozy qoıylǵan pasıentterge arnalǵan.
«Ekoǵa» otbasylyq juptar da, jalǵyzbasty áıelder de qatysa alady. Qazaqstan azamaty bolý jáne pasıentterdiń mindetti medısınalyq saqtandyrýy bolý kerek», - degen maman medısınalyq saqtandyrý júıesinde «ekoǵa» qatysýshylar qandaı krıterıımen irikteletinin aıtty.
«Eń birinshi reprodýktıvti jastaǵy pasıentter, erler faktoryna baılanysty bedeýlik, áıeldiń jatyr tútiksheleriniń ekeýi de bitelgen jaǵdaıda nemese otamen alynǵan kezde hırýrgıalyq gısteroskopıa, laparoskopıa, em-shara nátıjesi bolmaǵan kezde «ekoǵa» júgine alady. Gormonaldy emdeý nátıjesiz bolǵan bedeýlik túri de «ekoǵa» jatady. Joǵary tehnologıalardyń bárin paıdalansa da, bir jyldan asa bala kótere almaýdyń belgisiz genezi de «eko» jasatýǵa negiz bolady. Jambas músheleriniń endometrıozyna baılanysty bedeýlik te «ekoǵa» jatady», - dedi gınekolog-endokrınology.
Mamannyń málimeti boıynsha, ekouryqtandyrýǵa qatysatyn áıelderdiń jasyna qatysty shekteý alynǵan.
«Densaýlyq saqtaý mınıstrliginiń №272 buıryǵy boıynsha kvota berý múmkindigi keńeıdi. Buryn úmitkerlerdiń jasy 42 jasqa deıin shekteýli bolǵan. Jańa buıryq boıynsha áıel reprodýktıvti jasta bolýy kerek. Osy atalǵan kórsetkishter burynǵy buıryqta bolmaǵan. Sondyqtan bul «ekoǵa» úmitkerlerdiń sanyn arttyrady», - dedi Aıgúl Musabaeva.