ZIKSTO kompanıasy jaılylyǵy joǵary 300-den astam jolaýshylar vagonyn qurastyrady
Shveısarıalyq Stadler kompanıasy elimizde 2030 jylǵa deıin 537 zamanaýı jolaýshylar vagonyn shyǵarady. Bul týraly búgin Úkimet otyrysynda Indýstrıa jáne ınfraqurylymdyq damý mınıstri Marat Qarabaev aıtty, dep habarlaıdy Almaty-akshamy.kz QazAqparatqa silteme jasap.
«Temirjol mashınalaryn jasaýdy damytý naryqty lokomotıvtermen, júk jáne jolaýshylar vagondarymen tolyqtyrý mindetterin sheshýge baǵyttalatyn bolady. Bul Shveısarıa, AQSH jáne Fransıa ınvestorlarymen birlese júzege asady. Mysaly, Stadler 2030 jylǵa deıin arba, vagonnyń dánekerlengen shanaǵy, klımattyq qondyrǵy sıaqty otandyq komponentterdi paıdalana otyryp, jańa zamanaýı jolaýshylar vagondarynyń 537 birligin, sondaı-aq ınterer, eksterer, elektr jabdyqtarynyń 20 elementin shyǵarady», - dedi Marat Qarabaev.
Onyń atap ótýinshe, ZIKSTO kompanıasy jaılylyǵy joǵary 300-den astam jolaýshylar vagonyn qurastyrady.
«2030 jylǵa deıin temirjol mashına jasaýdyń barlyq baǵyttary boıynsha jergilikti qamtý ulǵaıtylady. Bolat daıyndamalaryn óndirý boıynsha iri jobalardy iske asyrý mashına jasaýshylardy qajetti shıkizatpen qamtamasyz etedi. Qazirgi ýaqytta óndiriste reseılik daıyndama paıdalanylady. İske qosylatyn jobalarda otandyq óndiris qazaqstandyq bolat negizinde qalyptasatyn bolady», - dedi mınıstr.