Ótken jyly elimizde qurastyrylǵan 103 myń jańa avtomobıl satyldy. Bul týraly búgin Úkimet otyrysynda Indýstrıa jáne ınfraqurylymdyq damý mınıstri Marat Qarabaev aıtty, dep habarlaıdy Almaty-akshamy.kz QazAqparatqa silteme jasap.
«Avtomobıl jasaý salasyna keletin bolsaq, 2022 jyldyń qorytyndysy boıynsha ishki naryqta 150 myń avtomobıl satyldy. Onyń 103 myń birligin otandyq kompanıalar jasap shyǵarǵan bolatyn. Bıyl avtomobıl óndirýshilerine qatysty saıasatty qaıta qaraý turǵysynan mańyzdy sanalady. Bul sektorda bizdiń aldymyzda 3 mindet tur. Birinshi - shyǵarylatyn avtomobılder qataryn keńeıtý. Qazirgi tańda eki avtomobıl zaýytynyń qurylysy júrip jatyr», - dedi ol.
Mınıstrdiń aıtýynsha, ekinshi - shaǵyn torapty qurastyrýdy damytý. Ol úshin avtokólik óndirýshilerine kólik quraldaryn oqshaýlaý jáne shaǵyn torapty qurastyrýǵa kóshý úshin talaptardy kúsheıtý boıynsha is-sharalar qabyldanyp jatyr. Úshinshi - komponenttik bazany qurý. Búgingi kúni dońǵalaq dıskilerin, akýmýlátorlardy shyǵaratyn kásiporyndar jumys isteıdi. Olardy otandyq avtomobılderge ornatý úshin omologasıa prosesi ótkizilýde.
«Oqshaýlaý deńgeıin tereńdetý aıasynda avtomobıl oryndyqtaryn, mýltımedıalyq júıeni, qaptamalardy, shashyratqyshtar men shınalar sıaqty avtokomponenttik bazany damytý josparlanýda. Ol úshin tıisti óndiris oryndarynyń qurylysy bastaldy», - dedi Marat Qarabaev.