Qazaqstan Úkimetiniń otyrysynda «Jaıly mektep» ulttyq jobasyn iske asyrý barysy qaraldy, dep habarlaıdy almaty-akshamy.kz
Oqý-aǵartý mınıstri Ǵanı Beısembaevtyń aıtýynsha, 2024-2025 jyldary 740 myń oqýshyǵa arnalǵan 369 jaıly mektepti, onyń ishinde bıyl 217 mektepti paıdalanýǵa berý josparlanyp otyr. Qurylys biryńǵaı standart boıynsha júzege asyrylatyn bolady. Bul rette 163 mektep (44%) aýyldyq jerlerde salynbaq.
Bul oqý nysandary zamanaýı quraldarmen jabdyqtalatyn bolady. Bastaýysh jáne joǵary synyptar úshin oqý kabınetteri, sanıtarıalyq toraptary jáne sport zaldary bar jeke bloktar qarastylyryp otyr. Mektepterdi zamanaýı tehnıkalyq quraldardy engizý jáne kúzetti kúsheıtý esebinen joǵary deńgeıdegi qaýipsizdik sharalarymen qamtamasyz etý josparlanýda. Sondaı-aq oqýshylarǵa yńǵaıly bolý úshin oqý quraldary men kıimderdi saqtaýǵa arnalǵan jeke shkaftar da qarastyrylǵan. Oǵan qosa jaıly mektepter erekshe bilim alý qajettilikteri bar balalar úshin kedergisiz orta bolmaq.
Mınıstr «Atameken» UKP men salalyq qaýymdastyqtar ókilderiniń usynystaryn eskere otyryp, otandyq óndirýshilerdi qoldaý boıynsha qosymsha sharalar qabyldanǵanyn aıtty. Máselen, jıhaz ónimderin tek «Samuryq-Qazyna» jáne «Atameken» tizilimindegi qazaqstandyq kompanıalardan satyp alý kózdelgen. Budan basqa otandyq óndiristegi qurylys materıaldaryn qoldaný boıynsha talaptar engizildi.
Óńirlerde mektep salý barysy týraly Túrkistan oblysynyń ákimi Darhan Satybaldy men Almaty oblysynyń ákimi Marat Sultanǵazıev aıtyp berdi.
Premer-Mınıstrdiń aıtýynsha, Memleket basshysynyń bastamasy boıynsha iske asyrylyp jatqan «Jaıly mektep» ulttyq jobasynyń el úshin mańyzy zor, onyń arqasynda úsh aýysymmen oqytatyn jáne apatty mektepter problemalary sheshilýi tıis. Jalpy salynyp jatqan mektepterdiń sany ár óńirdiń qajettiligin jáne onyń demografıalyq ahýalyn eskere otyryp anyqtalady.
«Olardyń barlyǵy jańa mektepterge asa muqtaj óńirlerde salynýy qajet. Onyń ústine, jaıly mektepter atyna zaty saı, oqýshylarǵa yńǵaıly ári bilim berý deńgeıi joǵary bolýy tıis. Olar qaýipsiz jáne sapaly bilim berý ortasyna aınalýy kerek», — dedi Oljas Bektenov.
Úkimet basshysynyń aıtýynsha, atalǵan mektepter áý bastan sıfrlyq kameralarmen jabdyqtalyp, polısıanyń Jedel basqarý ortalyqtaryna jalǵanýy tıis. Oǵan qosa jańa, ınteraktıvti oqytý ádisterin qoldanýǵa múmkindik beretin jyldamdyǵy joǵary ınternet júrgizilýi kerek.
Sonymen qatar Premer-Mınıstr jaıly mektepterdi oqý prosesine qajetti zamanǵa saı jabdyqtarmen jáne jıhazdarmen qamtamasyz etý qajettigin aıtty.
«Bul mektepterdi óskeleń urpaqty, ásirese shaǵyn qalalar men aýyldarda oqýshylardy baýrap alatyn biregeı ortalyqtarǵa aınaldyrý qajet. Onda sport seksıalary men shyǵarmashylyq úıirmeleri jumys isteýi kerek. Balalarǵa qosymsha bilim alý maqsatynda fılmder kórip, ınternetten qajetti aqparat izdeý, kitaphanada daıyndalý múmkindigi berilýi tıis», — dedi Oljas Bektenov.
Úkimet basshysynyń aıtýynsha, ulttyq jobany iske asyrýda belgili bir shıkilikter de bar. Atap aıtqanda, Memleket basshysy ýchaskelerdi bólý jáne jobalyq qujattamany ázirleý qarqynyn synǵa aldy. Osyǵan baılanysty barlyq problemany qysqa merzimde joıý tapsyryldy.
«Qurylys materıaldaryn, jabdyqtar men jıhazdardy satyp alý isine barynsha otandyq óndirýshilerdi tartý qajet. Jalpy Memleket basshysynyń jańa formattaǵy mektepter salý týraly tapsyrmasyn oryndaý úshin bar kúshimizdi jumyldyrýymyz kerek», — dedi Premer-Mınıstr.
Oljas Bektenov «Samuryq-Qazyna» qoryna 1 qyrkúıekke deıin 98 mektepti, al qalǵan 119 mektepti jyl sońyna deıin paıdalanýǵa berýdi tapsyrdy.
«Merzimderdiń buzylýyna eshqandaı jol berýge bolmaıdy. Bul rette jumystardyń sapasy aqsamaýy tıis», — dedi ol.
Óńirler ákimderine 15 naýryzǵa deıin mektep qurylysyna arnalǵan jer ýchaskelerin rásimdeýge qatysty barlyq problemalardy sheshý tapsyryldy.
«Bıyl paıdalanýǵa beriletin mektepterge baratyn joldar men ınjenerlik-kommýnıkasıalyq ınfraqurylymnyń qurylysyn 1 tamyzǵa deıin aıaqtaý qajet», — dedi Oljas Bektenov.
Oǵan qosa Úkimet basshysy obektiler ashylǵannan keıin birden naqty josparly oqý prosesin uıymdastyrý úshin salynyp jatqan mektepterdi aldyn ala pedagog kadrlarmen qamtamasyz etý kerektigin aıtty.
«Biz Ulttyq jobany iske asyrý barysyn maýsym aıynda qaıta qaraımyz. Eger jumys tásili ózgermese, jaýapty tulǵalarǵa qatań sharalar qoldanylatyn bolady», — dep túıindedi Oljas Bektenov.