Jaıaý júrginshilerdiń jol qozǵalysy erejelerin buzyp, belgilenbegen oryndarda taksı nemese kólik toqtatýǵa tyrysýy – uzaq ýaqyttan beri jalǵasyp kele jatqan másele. Mundaı zań buzýshylyqtar olardyń qaýipsizdigine ǵana emes, sondaı-aq júrgizýshiler úshin de ózindik keri áserin tıgizetinin jasyrmaımyz. Kólik júrgizýshileri jaıaý júrginshilerdi basyp ketpeý úshin manevr jasaýǵa májbúr bolady. Árıne, bul jolda kele jatqan ózge kólik júrgizýshileri úshin qater tóndiretini anyq, dep habarlaıdy aqshamnews.kz.
Jaıaý júrginshilerdiń erejeni buzýy
Almaty qalalyq polısıa departamentiniń málimetinshe, jaıaý júrginshiler arnaıy jabdyqtalǵan oryndarda nemese trotýarlarda kólik kútýi kerek. Jolǵa shyǵyp, taksı toqtatý - tikeleı Jol qozǵalysy erejelerin buzý. Bul úshin Ákimshilik quqyq buzýshylyqtar týraly kodekstiń 615-baby boıynsha jaza qoldanylady. Jaıaý júrginshilerge 2 aılyq eseptik kórsetkish (AEK) kóleminde aıyppul salynady, al qaıtalanǵan jaǵdaıda aıyppul kólemi 10 AEK-ke deıin ósedi.
Júrgizýshilerdiń jaýapkershiligi
Taksı toqtatyp turǵan júrginshilermen saýdalasatyn júrgizýshiler de jaýapkershilikten qutyla almaıdy. Kólik quraldaryn toqtatý jáne turaq erejelerin buzý boıynsha ÁQBtK 597-babyna sáıkes, jolǵa kedergi keltirgen júrgizýshilerge 10 AEK kóleminde aıyppul salynady.
Júrgizýshilerdiń jaıaý júrginshini qaǵyp ketý jaǵdaıy
Eger júrgizýshi ereje buzǵan jaıaý júrginshini qaǵyp ketse de, zań kóbinese jaıaý júrginshi jaǵynda bolady. Júrgizýshi jyldamdyqty saqtap, barlyq erejelerdi oryndasa da, apatty boldyrmaýǵa mindetti. Eger jaıaý júrginshi zardap shekse nemese qaıtys bolsa, júrgizýshi Qylmystyq kodekstiń 345 nemese 346-baptary boıynsha qylmystyq jaýapkershilikke tartylýy múmkin.
Sondyqtan ózgege kesirińiz tımesin deseńiz jol erejesin saqtaǵanyńyz abzal.