İshki ister mınıstrligi jaıaý júrginshilerge arnalǵan jańa erejege qatysty túsinikteme berdi
İshki ister mınıstrligi jaıaý júrginshilerdiń kósheden ótýin shekteıtin jol qozǵalysy erejelerine ózgerister engizilýine qatysty túsinikteme berdi, - dep habarlaıdy almaty-akshamy.kz.
2023 jyldyń qarasha aıynyń sońynda «Ashyq NQA» saıtynda jol qozǵalysy erejelerine ózgertýler engizý jobasy paıda boldy. Sonyń biri jaıaý júrginshilerdiń ruqsat beretin sıgnal boıynsha joldy kesip ótý erejelerine qatysty edi. Mamandardyń aıtýynsha, eger ereje osy kúıi qabyldanatyn bolsa, jaıaý júrginshilerdiń qıylystarda joldy kesip ótýi áldeqaıda qıyndaıdy. Óıtkeni, olar burylý manevrin oryndaı almaǵan kólikke jol berýge májbúr bolady. Mamandar bul tek keptelister sanyn ǵana emes, jazataıym oqıǵalardy da arttyrýy múmkin ekenin alǵa tartyp otyr.
«Jol júrisi qaǵıdalaryn bekitý týraly» Qazaqstan Respýblıkasy İshki ister mınıstriniń 2023 jylǵy 30 maýsymdaǵy №534 buıryǵyna ózgerister men tolyqtyrýlar engizý týraly» mınıstrlik buıryǵyn azamattardyń talqylaýy úshin saıtqa salǵanyn İshki ister mınıstrligi rastap otyr. 3-taraýdyń 16-tarmaǵyna: «Jol qozǵalysy retteletin jerlerde jaıaý júrginshiler jol dıspecheriniń nemese jaıaý júrginshi baǵdarshamynyń sıgnaldarymen, al olar bolmaǵan jaǵdaıda kóliktik baǵdarshammen júredi; baǵdarshamnyń ruqsat beretin sıgnaly qosylǵan kezde jaıaý júrginshi kólik qozǵalysyn aıaqtaǵanǵa deıin kútýi tıis», dep ózgeris engizilgen.
«Bul standart, eń aldymen jaıaý júrginshilerdiń qaýipsizdigin qamtamasyz etýge arnalǵan. Óıtkeni, qazirgi ýaqytta jaıaý júrginshiler kóbinese ózderiniń qaýipsizdigine mán bere bermeıdi. Baǵdarshamnyń jasyl túsi jana salysymen kólik quraldary buryn bastaǵan manevrdi aıaqtady ma nemese onyń jaıaý júrginshiler jolynyń aldynda toqtaýǵa múmkindigi bar ma degen máselege bas aýyrtpaı jolǵa shyǵa beredi», - dedi mınıstrlik.
İshki ister mınıstrligi túzetýlerdiń áli qabyldanbaǵanyn, egerde qabyldaý bolǵan jaǵdaıda qoǵamdyq talqylaý nátıjeleri eskeriletinin basa aıtty.