Almaty oblysynda Voroshılov sý qoımasynyń bógeti buzylýynan Baıkent pen Qaraoı aýylyndaǵy úılerdi sý basqan joq, dep habarlaıdy Almaty-akshamy.kz.
«30 naýryz saǵat 15:50–de İle aýdany Baıkent aýylynda Voroshılov sý qoımasynyń bógeti buzyldy. Jarylǵan bógettiń eni — shamamen 4-5 metr. Sý Jarmuhamet ózeniniń negizgi arnasymen aǵyp, ary qaraı Amangeldi 1 jáne Amangeldi 2 toǵandaryna quıady, onda barlyq shlúzder ashyq. Sý tranzıttik rejımmen óte otyryp, ary qaraı Qaskeleń ózenine, odan soń Qapshaǵaı sý qoımasyna quıady» dep habarlady Almaty oblysy ákimdiginiń baspasóz qyzmeti.
Ákimdik sondaı-aq Baıkent, Qaraoı aýyldarynda turǵyndardyń úılerin sý baspaǵanyn habarlady.
«Búkil turǵyndarǵa evakýasıalaý múmkin ekendigi habarlandy. Alaıda, sý basý nemese zardap shekkender bolǵan joq» delinedi habarlamada.
Eske salaıyq, keshe İle aýdany Baıkent aýyldyq okrýgindegi Voroshılov sý qoımasynyń bógeti buzylǵan bolatyn.
Aıta keteıik, 31 naýryz saǵat 01:30-dan bastap Ashshylysaı kólinde sý deńgeıiniń kóterilýi jáne Qaraoı aýylyn sý basý qaýpine baılanysty «Baıserke-Mejdýrechınsk» tasjolynyń 23-42 shaqyrymy (Almaty qalasynan Chapaev aýylyna deıin) jabylǵan.