Halyqaralyq baǵdarlamalar ortalyǵy» AQ Izraıldegi soǵys jaǵdaıyna baılanysty ondaǵy «Bolashaq» stıpendıattary elge qaıtarylatynyn málimdedi, dep habarlaıdy Almaty-akshamy.kz
«Izraılde «Bolashaq» baǵdarlamasy arqyly 16 adam bilim alyp jatqan. Onyń ishinde Haıfa qalasynda 12 stýdent bar. Qalǵan 4 stýdent basqa qalalardaǵy uıymdarda taǵylymdamaǵa ketken. Olar búgin Qazaqstannyń evakýasıalaý ushaǵymen elge qaıtarylady», - dedi ortalyqtyń baspasóz qyzmeti.
Sondaı-aq ortalyqtyń baspasóz qyzmeti olardyń oqýyn jalǵastyrý máselesin arnaıy qarastyratynyn jetkizdi.
Aıta keteıik, Izraıldegi Qazaqstan elshisi Satybaldy Burshaqov Kazinform agenttigine bergen eksklúzıv suhbatynda Qazaqstan azamattaryn evakýasıalaý jumysy qalaı júrip jatqanyn baıandaǵan edi.
«Qazirdiń ózinde Qazaqstannyń 150 azamatyn tizimge tirkedik. Arnaıy reıstiń ashylǵanyn tańerteń jarıalaǵandyqtan, kúndiz qońyraý shalǵan adam kóp boldy. Baǵana aıtqandaı, biz tizimdi áý bastan jasap qoıǵanbyz, kimniń qaıda ekenin aldyn ala bilip otyrdyq. Sonyń arqasynda jumys jeńil ótti», - dedi Satybaldy Burshaqov.