Igi oılar kóńildi jadyratady
«Ár adam kúnine tym bolmaǵanda, bes mınýt aqymaq bolady. Aqyldy adam atanýdyń joly – sol lımıtti azaıtý» depti danyshpan Deıl Karnegı. Rasynda solaı. Qazir aınalaǵa kóz jiberseńiz, nebir aqyldy, bilimi men biligi kelisken jastarǵa kózińiz túsedi. Shetinen myqty. Ylǵı «sen tur, men ataıyn» deıtin qarakózderimizdiń qatary artqan. Bul óte qýanarlyq jaǵdaı. Ǵylym men tehnıkany ıgergen, saýatty, shet tilderinde saıraıtyndardy kórip tańdanasyz. Bir jaǵynan súısinip, qazaqtyń ul-qyzdarynyń qulshynysyna sondaı razy bolasyz. Bálkim, muny myna naryqtyq zamannyń, básekelestik kezeńniń artyp bara jatqanymen baılanystyrsaq, artyq emes shyǵar. Óıtkeni, árbirimiz kún kórýimiz kerek. Eger ózińizge buıyryp turǵan zatqa qol sozsańyz, onda ol jaqyndaı túsedi. Biraq osy atalǵannyń bárine tek qana jete bilý qajet. Ol úshin talpynys túgesilmegen abzal.
Bizdi kópten beri tolǵandyryp júrgen bir oılar bar. Bul jóninde únemi aıtyp, keı-keıde, oqta-tekte qalam terbep te júrmiz. Dálirek aıtqanda, buǵan deıin táptishtep jazbasaq ta, iriktep qaǵaz betine túsirdik. Onyń birshamasyn jarıaladyq ta. Sonyń sabaǵyn tarqatatyn ýaqyt keldi.
Ata-babamyz jaqsyny kórmek úshin deıdi. Dál taýyp aıtylǵan naqyl sóz. Sol sebepti de ıgi ister jasaý úshin, eń bastysy, bizder ózimizdi qaıraýymyz kerek sıaqty. Fılosoftardyń meńzeıtini de osy.
Kúlip júrýge tyrysyńyz...
Adamnyń janynyń jadyraıtyn kezi ol kúle bilgen shaǵynda. Satırık Ýálıbek Ábdiraıymov «óz kóńilińizdi ózińiz kóterińiz, sizge basqa bireý syrttan kelip kóterip bermeıdi» deıdi. Sóziniń jany bar. Shynymen de, aınaladaǵy sátterden bir aýyq oıdy bólińiz. Túrli komedıalyq fılmder, qysqasha rolıkter qaraı júrińiz. Múmkin bolsa, Qojanasyr men Aldar kóse jaıyndaǵy qysqasha ázilderdi jattap alyńyz. Toı-jıyn, otyrystarǵa barǵanda qajet bolmaq. Qazaq «Aýzynda ázili joqtyń, qoınynda qolshoqpary júredi» deıdi. Dóp tabylǵan sóz. Eger ózińizdi kúnige 30-40 mınýt ázil kórýge, ony hám qyzyqty etip aıtýǵa tyrysyńyz. Sonda sergek bolasyz. İsińiz alǵa basady.
Qym-qýyt tirlikti jeńil qabyldańyz...
Amerıkalyq ǵalymdardyń aıtýynsha, adam ómiriniń 25 jyly uıqymen ótetin kórinedi. Al qytaı fılosofy Konfýsıı «uıqy degen - kishi ólim» depti. Meıilinshe, uıqy men tamaqty durys josparlaǵan durys. Barlyǵyn bir qalypty rejımde ustańyz. Sonda sizde álsizdik pen sharshaý bolmaıdy. Múmkin, qatty sharshaǵan ýaqytta kóbirek tynyqqan da jón shyǵar. Muny árkimniń óz erkine qaldyrdyq. Mıdy qajetsiz aqparatpen toltyrmańyz. Sózdiń toq eteri, máseleni jeńil qabyldap úırengen adam bárinen ozbaq.
Túıin
Bylaı qarap tursańyz, túk qıyn nárseler emes. Barlyǵyn jasaýǵa ári júzege asyrýǵa bolady. Tek nıet pen ynta kerek. Osy atalǵandardy birtindep iske asyrýǵa daǵdylanyńyz. Bári ózińizdiń qolyńyzda! Oıǵa alǵan isterdiń oryndalaryna senińiz!