Babalarymyzdyń aıtqan árbir sózderiniń máni tereń maǵynaly. «Balań ózińe tartsa juban, qoǵamǵa tartsa qýan», - dep beker aıtpaǵan dana halqymyz. Mundaǵy negizgi mán qoǵammen etene aralasý, qoǵamǵa paıdasyn tıgizý, qoǵamda belgili bir oryn tabý maqsatynda aıtylsa kerek-ti. Al sol balanyń qoǵamǵa, elge paıdasy tıetin azamat bolyp qalyptasýyna aldymen ata-ananyń sodan keıin mektep ujymynyń tıgizer áseri óte mol. Bala aldyndaǵy jaýapkershiliktiń júgi jeńil emes. «Ákege qarap ul óser, sheshege qarap qyz óser», - degen babalarymyz. Demek, balańyzdyń bolashaǵyn qalaı kórgińiz kelse onda sizde sondaı bolǵanyńyz abzal. Babalarymyz ony «Balapan uıadan ne kórse sony iledi», -dep bir aýyz sózge syıdyrǵan.
Ia, ýaqyt alǵa syrǵyǵan saıyn zaman talaby da ózgeriske ushyrap jatqanyn joqqa shyǵara almaımyz. Keshegi men búgingini salystyrý múmkin bolmaı bara jatyr. Ǵalymdar muny aqparattar aǵyny zamany dep te topshylaýda. Onysymen tolyq kelisýge bolady. Qazir qolyńyzdaǵy telefonnyń ózi aqparat quralyna aınalǵany qashan. Áleýmetti ózine telmirtken áljeli talaı otbasynyń shyrqyn buzyp, túp-túzý tárbıe alyp kele jatqan balalardyń ómirine syzat túsirip jatqany ashshy da bolsa shyndyq. Tipti, keıbir balǵyn balalar bloger bolamyz dep maqsatta qurǵany qoǵam úshin qaýipti ekenin jasyrmaýymyz kerek. Babalarymyz «aýyrýyn jasyrǵan óledi», - dep bekerge aıtpasa kerek-ti. Osynaý qoǵamǵa qaýip tóndirip turǵan osy máseleni aıtpasaq, jazbasaq keleshegimizdiń kemel bolatynyna shúbá keltirerimiz anyq.
Talaptyń tulparyna mingen jastar az emes. Shúkir! Bar. Biraq, sol talanttylardy talapsyzdar jutyp ketpeı me? Mine, másele osy! Búgingi kúni kitap arqalap, jazý jazǵan adamǵa túrpaıy qaraıtyndar kóbirek bolyp tur. Osy rette elimizge belgili aqyn Bekjan Áshirbaevtyń myna sózi eske túsedi.
Oktábráttar ornyna
Aqpaqulaqtar keldi ǵoı.
Pıonerler ornyna
Zıankerler keldi ǵoı.
Komsomoldar ornyna
Nan soǵarlar keldi ǵoı.-dep qoǵamnyń jarasyn dóp basyp aıtqan edi.
Jalpy jarany aıtyp ony jazýdyń jolyn jazbasaq taǵy bolmaıdy. Búgingi kúni «balamyzdy sizderge berdik. Tárbıeleńizder, oqytyńyzdar. Ary qaraıǵy jumys Sizderde»,-deıtinder de tabylady. Óte qate uǵym. Negizi aldymen balanyń tárbıesi otbasynan bastalady. Otbasynda túzý tárbıe alǵan bala bolashaǵyn boljaı alady. Al muǵalimder bilim jolynda tárbıe beredi. Oqyp, jazýǵa múmkindik syılaıdy. Talǵap oqýdy, paıdaly dúnıege yntyqtyrýdy úıretedi. Mine, eki ortadaǵy ara salmaq osyndaı.
Búgingi kúni osyndaı talǵamy qalyptasqan ozat oqýshylarymyz joq emes bar. Úkili úmitimizdi arqalap júrgen Baqnur Begaly, Erkenaz Pernebek, Arýna Joldasbek, Oljas Myrzabek, Aqnıet Ibadýlla sekildi oqýshylarymyzdyń atyn maqtanyshpen ataımyz. Bul shákirtterimizdi maqtan tutamyz. Jáne de keleshekte osy ozat oqýshylarymyz mektebimizdiń atyn shyǵarady degen senimdemiz. Osy rette Túrkistan oblysy Otyrar aýdany «Kókmardan jalpy bilim beretin» mektebiniń dırektory Myrzash Bımenniń pikirin bilip edik.
- Búgingi tańda elimizde bilim salasyna qatysty túrli alyp-qashpa áńgimeler aıtylyp, synalyp keledi. Ol oryndy. Syn adamdy túzeıdi. Biraq, syn – shyn bolýy tıis. Elimizde bilim salasyna tıisti deńgeıde kóńil bólinip jatyr. Muǵalimderdiń bedelin kóterý jolynda da kóptegen jumys jasalýda. Mine, osynaý jaǵdaıdy ońtaıly paıdalanyp mektebimizde talmaı eńbek etý ústindemiz. Biz aldymen bilim sapasyna mán beremiz. Bala tárbıesi ońaı sharýa emes. Únemi soǵan saı qımyl-áreket etýimiz kerek. Bilim berý úshin bilimdi bolý eń alǵashqy shart. Al bilim izdenistiń arqasynda keledi. Ujymymyzdaǵy árbir muǵalim keldim-kettim degen ustanymda emes. Kerisinshe bilimdi balaǵa qalaı bersek qyzyqty bolady degen izdeniste júredi. Búgingi balalarǵa bilimdi qyzyqtyryp, tartymdy etip bermeseńiz balany bilimge tartý ońaı bolmaı qaldy. Osy rette ujymymyzdaǵy bilikti muǵalimderimizdi atap ótken jón bolar. Uljan Ratqulova, Perızat Sahova, Jáýdir Esbolǵanova, Perızat Quttybaeva, Lázzat Rysbekova, Beısenkúl Nyshanbaeva sekildi muǵalimderimiz baptaǵan oqýshylar oblystyq, respýblıkalyq jarystardan oryn alyp, ujymymyzdyń mereıin kóterip jatqan jaıy bar. Bul da damýdyń dara joly desek artyq aıtpaǵandyq bolar, - deıdi mektep dırektory.
Dúnıede eń baqytty adam bilimdi adam. Al bilim izdenistiń artynda jasyrylǵany haq.