Italıada aýdany men uzyndyǵy jaǵynan eń úlken Po ózeni tartylyp jatyr, dep habarlaıdy Almaty-akshamy.kz Inform.kz-ke silteme jasap.
Sý tapshylyǵy dıqandardyń eginin qurtýda. Birneshe aı buryn ǵana jasyl jaǵalaýdy boılaı aǵyp jatqan ózen arnalary qazirgi kezde shólge uqsaǵan.
Italıanyń soltústigindegi qurǵaqshylyq sońǵy 70 jyldaǵy eń aýyry dep sanalyp otyr. Oǵan kóktem men jazda jaýyn-shashynnyń, al qysta qardyń az jaýǵany, jazda aýa temperatýrasynyń joǵarylaýy sebep bolǵan.
Shilde aıynyń basynda qurǵaqshylyqqa baılanysty Italıanyń soltústigindegi bes aımaqta tótenshe jaǵdaı jarıalanǵan. Ondaǵan mýnısıpalıtette sýdy normalaý rejımi engizilgen. Po alqabyndaǵy sharýalar ózenniń keı jerleri tartylyp qalǵanyn, taǵy bir ýchaskelerinde teńizdiń tuzdy sýy aǵynǵa ótip, eginge zıan tıgizip jatqanyn aıtyp otyr.
Po ózeni Italıanyń soltústiginde ońtústik-batys Alpiden Adrıat teńizine deıin 650 shaqyrymǵa sozylǵan. Eldiń aýyl sharýashylyǵy salasynyń úshten bir bóligi derlik osy ózenmen baılanysty.