Qazaqstan men Italıa arasyndaǵy taýar aınalymy 2021 jyly 9,5 mlrd dollarǵa deıin ósti.
Apennın túbeginen elimizge quıylǵan tikeleı sheteldik ınvestısıa kólemi 123 mln dollarǵa jýyqtaǵan. Taraptar osy kórsetkishti ulǵaıtýdy kózdep otyr. Bul QR Premer-Mınıstriniń orynbasary, Syrtqy ister mınıstri Muhtar Tileýberdiniń Italıanyń saıası jáne isker toptarymen kelissózderiniń qorytyndysynda belgili boldy, dep habarlaıdy Almaty-akshamy.kz
Aıta keteıik, qazirdiń ózinde 200 ıtalıalyq kompanıa munaı-gaz sektorynda, qurylysta, ınfraqurylymdy damytýda jáne energetıkada jumys isteýde. Sonymen qatar, eýropalyq kásipkerler tamaq jáne óńdeý ónerkásibi, kólik jáne logıstıka, aýyl sharýashylyǵy, mashına jasaý jáne jasyl energetıka salalarynda birlesken jobalardy damytýǵa qyzyǵýshylyq tanytýda.
"Italıalyq kompanıalar Qazaqstandaǵy jobalarǵa ınvestısıa salǵan seksıa erekshe qyzyǵýshylyq týdyrdy. Ásirese geosaıası jaǵdaıǵa baılanysty belgili bir qıyndyqtarǵa tap bolǵan jáne óz bıznesin Reseıden basqa elderge kóshirýge nıetti kompanıalar arasynda asa suranysqa ıe boldy. Sonymen qatar, yntymaqtastyqtyń keleshegin talqyladyq jáne ınvestısıalyq klımat aıasynda usyna alatyn barlyq jeńildikterdi tanystyrdyq", - QR Premer-mınıstriniń orynbasary – dedi Syrtqy ister Mınıstri Muhtar Tileýberdi.
"Sanksıalar Italıa ekonomıkasy men bıznesine áser etedi. Bizdiń úkimet saýda agenttikterin qoldap, ózge naryqtarda jańa múmkindikter izdestirýde. Bul Qazaqstanǵa eksporttaý nemese ınvestısıa salý múmkindigi bar degen sóz. Biz ıtalıalyq kompanıalardyń jetkizý naryqtaryn ártaraptandyrýyn qalaımyz. Osy rette Qazaqstan asa qyzyqty naryq", - dedi Italıa saýda jáne ınvestısıalyq agenttiginiń dırektory Roberto Lýongo.
Ekijaqty yntymaqtastyqty keńeıtýdegi taǵy bir mańyzdy qadam – Qazaqstan men Italıa arasynda tikeleı áýe qatynasynyń ashylýy. 12 maýsymnan bastap Mılan-Almaty baǵytynda turaqty reıs iske qosyldy. Sarapshylardyń aıtýynsha, reısterdiń koronavırýstyq pandemıadan keıin týrızm salasyn qalpyna keltirýdegi yqpaly zor bolmaq.