Turǵyn úı qurylys jınaqtary salasynda mamandanǵan Otbasy bank, Qazaqstan Qurylysshylar odaǵy jáne Islam qarjysy men bıznesiniń qaýymdastyǵy (AIFB) ıslamdyq qarjy ındýstrıasyn damytý týraly memorandýmǵa qol qoıdy. Kelisimniń maqsaty – sharıǵat qaǵıdattaryna negizdelgen ıslamdyq qarjy quraldaryn, sonyń ishinde ıpotekany engizý, dep habarlaıdy aqshamnews.kz
Yntymaqtastyq aıasynda zańnamany zertteý jáne ony Qazaqstan Respýblıkasynda ıslamdyq ıpotekany iske qosý úshin ózgertý múmkindikteri qarastyrylmaq. Sonymen qatar, oqytý semınarlary men zertteý jumystaryn júrgizý josparlanýda. 2025 jyldyń ózinde-aq klıentterge úıdi paıyzsyz satyp alý múmkindigin beretin mehanızm jasalady, bul sharıǵat talaptaryna sáıkes keledi.
Otbasy bank sondaı-aq Malaızıalyq CSQlaw Kazakhstan Branch kompanıasynyń fılıalymen kelisimge qol qoıdy. Bul kompanıa bank qyzmetkerlerin ıslamdyq qarjylandyrý jáne qarjylyq quqyq negizderine oqytýmen aınalysady. Bul bolashaqta osy segmentte sapaly qyzmet kórsetýdi qamtamasyz etýge múmkindik beredi.
Bul bastama dinı qaǵıdattardy ustanatyn azamattarǵa turǵyn úı máselesin sheshýge jol ashady.
Aıta keteıik, qazirgi tańda Qazaqstanda eki ıslamdyq bank jumys isteıdi:
ADCB ıslam banki (tek bızneske qyzmet kórsetedi).
Zaman-Bank ıslam banki (jeke tulǵalarǵa tek «Vakala» ónimin, ıaǵnı depozıttiń analogyn usynady).
Sondaı-aq memlekettik sektorda da kredıtke uqsas, biraq ıslamdyq qarjylandyrý qaǵıdattaryna negizdelgen ónimder bar. Mysaly, «Damý» qory shaǵyn jáne orta kásipkerlik sýbektilerin ıslamdyq qarjylandyrý qaǵıdalary boıynsha qoldaýdy usynady.