QR İshki ister mınıstriniń birinshi orynbasary Marat Qojaev qarjy pıramıdasy úshin ózin-ózi órtep jibergen áıeldiń oqıǵasyna qatysty pikir bildirdi, dep habarlaıdy Almaty-akshamy.kz QazAqparatqa silteme jasap.
11 sáýirde elordadaǵy İshki ister mınıstrligi ǵımaratynyń aldynda Mudabarah Capital qarjy pıramıdasynan zardap shekken áıel óz-ózin órtep jiberdi. Oǵan alǵashqy medısınalyq kómek kórsetildi jáne aýrýhanaǵa jatqyzyldy.
«Quqyq buzýshylardyń is-áreketinen shyǵynǵa ushyraǵan adamdar túrli psıhofızıologıalyq qysymǵa túsedi. Keıbiri buǵan shydaı almaıdy. Osylaısha jábirlenýshilerdiń biri, meniń oıymsha, tergeý organdaryna qysym kórsetý maqsatynda osy qadamǵa bardy (ózin-ózi órtedi – red.). Otty sóndirip úlgerdi, qazir ol aýrýhanada jatyr jáne ómirine esh qaýip joq. Mendegi bar aqparat osy», - dedi Marat Qojaev Májilistiń jalpy otyrysynan keıin tilshilerge bergen suhbatynda.
Atalǵan qylmystyq is boıynsha 14 adam jaýapqa tartylǵan, olardyń altaýy qamaýda otyr. Tergeý jumystary aıaqtalýǵa jaqyn.
«Birneshe adam úıqamaqta otyr. Eki adam kepilmen jáne birnesheýi eshqaıda ketpeý týraly qolhatpen bosatylǵan. Mundaı bultartpaý sharalarynyń jazalaý emestigin túsiný kerek. Ol ár adamǵa jeke taǵaıyndalady, tek adam jasyrynyp qalmaýy úshin, jańa qylmys jasamaýy úshin jáne basqa adamdardy tergeýge kedergi keltirýge úgittemeýi úshin jasalady. Bul áli jaza emes. Alaıda osy qylmystyq is boıynsha jábirlenýshiler kimniń qamaýda, kimge bultartpaý sharalary qoldanylýy kerektigin sheship qoıǵan. Ókinishke qaraı, osyndaı emosıalar baıqalady, biraq biz bul sharalardy zańnamaǵa sáıkes retteýimiz kerek», - dedi M. Qojaev.